Maktabgacha va maktab ta’limi vazirligi tomonidan maktabgacha ta’lim tashkilotlari tarbiyalanuvchilari o‘rtasida "shaxmat festivali” tadbirining Respublika bosqichi va taqdirlash marosimi bo‘lib o‘tdi.

Qayd etish lozim, O‘zbekiston Respublikasi Prezidentining “2026-yil O‘zbekistonda bo‘lib o‘tadigan 46-Butunjahon shaxmat olimpiadasiga kompleks tayyorgarlik ko‘rish hamda shaxmatni ommaviy harakatga aylantirishga oid chora-tadbirlar to‘g‘risida” 2023-yil 8-maydagi PQ–150-son qaroriga muvofiq maktabgacha ta’lim tashkilotlari tarbiyalanuvchilari o‘rtasida “Shaxmat festivali” musobaqalarini tashkil etish vazifasi belgilangan.

Shu munosabat bilan, O‘zbekiston Respublikasi Maktabgacha va maktab ta’limi vazirligining tegishli buyrug‘i bilan tasdiqlangan “Maktabgacha ta’lim tashkilotlari tarbiyalanuvchilari o‘rtasida “Shaxmat festivali” musobaqalarini o‘tkazish to‘g‘risidagi nizom”ga muvofiq maktabgacha ta’lim tashkiloti tarbiyalanuvchilari o‘rtasida “Shaxmat festivali” musobaqasining maktabgacha ta’lim tashkiloti bosqichi joriy yilning 1-11-aprel kunlari, tuman (shahar) bosqichi 14-18-aprel kunlari, viloyat bosqichi 21-25-aprel kunlari o‘tkazildi.

Bugun, 2-may Toshkent shahrida joylashgan Xalqaro shaxmat akademiyasi binosida maktabgacha ta’lim tashkilotlarining tarbiyalanuvchilari o‘rtasida “Shaxmat festivali” musobaqasining respublika bosqichi o‘tkazildi.

“Shaxmat festivali” musobaqasining respublika bosqichida jami 28 nafar (14 nafari o‘g‘il va 14 nafar qiz) tarbiyalanuvchilar ishtirok etdilar va o‘zaro bellashdi.

Musobaqa yakunlari bo‘yicha o‘g‘il va qiz bola tarbiyalanuvchilardan faxrli 1-, 2- va 3-o‘rin g‘oliblari aniqlanib vazirlik diplomi, qolgan ishtirokchilar faxriy yorlig‘i hamda qimmatbaho esdalik sovg‘alari bilan taqdirlandilar.

Eslatib o‘tamiz: Musobaqada maktabgacha ta’lim tashkilotining 5-7 yoshli o‘g‘il va qiz bola tarbiyalanuvchilari yakka tartibda ishtirok etdilar.

Ma’lumot uchun: Mazkur musobaqalarining maktabgacha ta’lim tashkilotida o‘tkazilgan 1-bosqichida 30 352 nafar tarbiyalanuvchi, 2- tuman va shahar bosqichida 7 375 nafar, hududiy 3-bosqichida 416 nafar, 4- respublika bosqichida 28 nafar tarbiyalanuvchilar ishtirok etdi.