BAAning Dubay shahrida Maktabgacha va maktab taʼlimi vazir o‘rinbosari Farhod Boqiyev hamda «Muhammad bin Rashid Al-Maktum Global Tashabbuslari» jamg‘armasi vakillari bilan ishchi uchrashuvi bo‘lib o‘tdi.

Uchrashuv davomida O‘zbekistonda Reading Challenge tashabbusini amalga oshirish masalalari muhokama qilinib, uning metodologiyasi, o‘quvchilarni rag‘batlantirish mexanizmlari, maktab, hududiy va respublika bosqichlarini tashkil etish, shuningdek, taʼlim muassasalarini metodik va raqamli qo‘llab-quvvatlash masalalariga alohida eʼtibor qaratildi.

Muzokaralar yakunlariga ko‘ra, loyihani amalga oshirish bo‘yicha amaliy qadamlar, jumladan, yo‘l xaritasini kelishish va tashabbusni respublika miqyosida bosqichma-bosqich joriy etish bo‘yicha kelishuvlarga erishildi.

Tomonlar O‘zbekistonda kitobxonlik madaniyatini rivojlantirish va inson kapitaliga investitsiya kiritishga qaratilgan uzoq muddatli hamkorlikni davom ettirishga tayyor ekanliklarini tasdiqladi.