Fransiyaning Bureau Veritas kompaniyasi bilan strategik hamkorlik kengaymoqda
2026-06-18 10:00:00 / Yangiliklar
🫥Beshinchi Toshkent xalqaro investitsiya forumi doirasida O‘zbekiston Texnik jihatdan tartibga solish agentligi direktori Akmal Jumanazarov Fransiyaning Bureau Veritas kompaniyasi vitse-prezidenti Karine Kutrowski boshchiligidagi delegatsiya bilan uchrashuv o‘tkazdi.
🫥Uchrashuvda texnik jihatdan tartibga solish, muvofiqlikni baholash, sertifikatlashtirish hamda sinov infratuzilmasini rivojlantirish sohalaridagi hamkorlik istiqbollari muhokama qilindi. Tomonlar xalqaro tajribani joriy etish va ilg‘or amaliyotlarni tatbiq etish masalalariga alohida e’tibor qaratdilar.
Muloqot davomida O‘zbekistonda joriy etilayotgan yangi milliy muvofiqlik belgisi — “Conformity Uzbekistan” (CUz), mahsulotlarning xalqaro va Yevropa standartlari (EN, ISO, ASME, ASTM, IEC) talablariga muvofiqligini baholash hamda CE markirovkasi yo‘nalishlaridagi hamkorlik masalalari ko‘rib chiqildi.
Shuningdek, sifat menejmenti tizimlarini sertifikatlashtirish, malakali kadrlar tayyorlash, mutaxassislar malakasini oshirish va zamonaviy sinov laboratoriyalarini tashkil etish bo‘yicha o‘zaro hamkorlikni kengaytirish yuzasidan fikr almashildi.
🫥Uchrashuvda xalqaro amaliyot hamda texnik jihatdan tartibga solish ta’sirini baholash natijalari asosida texnik reglamentlarni takomillashtirish, ularning samaradorligini oshirish hamda ushbu jarayonlarga Bureau Veritas ekspertlarini jalb etishdan manfaatdorlik bildirildi.
Muzokaralar yakunida bolalar o‘yinchoqlari, past voltli uskunalar, bosim ostida ishlaydigan qurilmalar va shaxsiy himoya vositalarini sinovdan o‘tkazish uchun qo‘shma laboratoriyalar tashkil etish ustuvor yo‘nalish sifatida belgilandi. Tomonlar hamkorlik bo‘yicha “Yo‘l xaritasi”ni ishlab chiqish hamda o‘zaro manfaatli hamkorlikni yanada faollashtirishga kelishib oldilar.