Ishlab chiqaruvchi korxonalar bilan texnik tartibga solish va sifatni ta’minlash masalalari muhokama qilindi
2026-06-17 11:00:00 / Yangiliklar
⛈ Texnik tartibga solish agentligi direktori Akmal Jumanazarov tomonidan Toshkent viloyati Zangiota tumanida faoliyat yurituvchi ishlab chiqaruvchi korxonalar bilan uchrashuv o‘tkazildi.
⚡️ Jumladan, “Techno Cable Group” MChJ QK, “Global Petrochemical Group” MChJ hamda “Technologies of Real Time” MChJ korxonalari vakillari bilan bo‘lib o‘tgan muloqot davomida kabel mahsulotlari, kimyo mahsulotlari hamda avtomobil ehtiyot va butlovchi qismlarini ishlab chiqarish jarayonlari, mahsulotlar sifati va xavfsizligini ta’minlash masalalari muhokama qilindi.
Uchrashuvda korxonalarning mavjud laboratoriyalari salohiyatidan samarali foydalanish, laboratoriyalarni rivojlantirish va akkreditatsiyadan o‘tkazish, mahsulotlarni xalqaro standartlar talablariga muvofiq sinovlardan o‘tkazish hamda ishlab chiqarish jarayonlariga xalqaro standartlarni keng joriy etish bo‘yicha hamkorlik masalalari ko‘rib chiqildi.
Shuningdek, ishlab chiqarilayotgan mahsulotlar sifatini oshirish, ularning raqobatbardoshligini ta’minlash, xalqaro talablar asosida ishlab chiqarishni yo‘lga qo‘yish, ichki va tashqi bozorlarda mahsulotlarning ishonchliligi hamda sifat ko‘rsatkichlarini yaxshilash yuzasidan tavsiyalar berildi.
Muloqot davomida ichki bozorda realizatsiya qilinayotgan kabel mahsulotlari, kimyo mahsulotlari va avtomobil ehtiyot hamda butlovchi qismlari ustidan bozor nazoratini samarali tashkil etish, nomuvofiq mahsulotlarning muomalaga chiqarilishining oldini olish, mahsulotlar sifati va iste’molchilar xavfsizligini ta’minlash masalalari yuzasidan fikr almashildi.
Shuningdek, O‘zbekiston Respublikasi Prezidentining 2026-yil 16-fevraldagi PF–25-son Farmoni asosida tadbirkorlar uchun yaratilgan imkoniyat va imtiyozlar, texnik jihatdan tartibga solish sohasida amalga oshirilayotgan islohotlar, standartlashtirish va metrologiya yo‘nalishlarida ko‘rsatilayotgan xizmatlar haqida batafsil ma’lumot berildi.
Uchrashuv yakunida tomonlar o‘rtasida laboratoriyalar salohiyatidan hamkorlikda foydalanish, xalqaro standartlarni joriy etish, bozor nazoratini takomillashtirish, mahsulotlar sifatini ta’minlash hamda korxona xodimlari malakasini oshirish yo‘nalishlarida hamkorlikni yanada rivojlantirish bo‘yicha kelishib olindi.