COOMET Etalonlar bo‘yicha birlashgan qo‘mitasining 30-yig‘ilishi xalqaro metrologiya hamkorligini rivojlantirishda muhim bosqich bo‘ldi
2026-06-12 10:00:00 / Yangiliklar
✅ Tojikiston Respublikasining Dushanbe shahrida COOMET Etalonlar bo‘yicha birlashgan qo‘mitasining (EBQ) navbatdagi 30-yig‘ilishi bo‘lib o‘tdi. Tadbirda aʼzo davlatlarning milliy metrologiya institutlari texnik qo‘mitalari rahbarlari hamda yetakchi mutaxassislari ishtirok etdi.
✅Yig‘ilish davomida CIPM MRA kelishuvini amalga oshirish, xalqaro hamkorlikni yanada rivojlantirish, CMC-satrlarni ko‘rib chiqish va ekspertizadan o‘tkazish, asosiy metrologik solishtirishlarni tashkil etish hamda COOMET texnik qo‘mitalari faoliyatini takomillashtirish bilan bog‘liq masalalar muhokama qilindi.
O‘zbekiston delegatsiyasi yig‘ilishda faol ishtirok etib, milliy metrologiya instituti vakillari COOMETning TQ 2 “Qonunlashtiruvchi metrologiya” va TQ 4 “Axborot va taʼlim” yo‘nalishlari bo‘yicha amalga oshirilayotgan ishlar yuzasidan axborot taqdim etdi. Shuningdek, mintaqaviy metrologiya infratuzilmasini rivojlantirish hamda soha mutaxassislarini tayyorlash bo‘yicha dolzarb masalalar muhokama qilindi.
✅Ishtirokchilar tomonidan xalqaro solishtirishlar monitoringini kuchaytirish, yangi CMC-qatorlarni ishlab chiqish va ularni ekspertizadan o‘tkazish, o‘lchash va kalibrlash imkoniyatlarini saqlab qolish hamda ularning xalqaro darajada tan olinishini kengaytirish masalalariga alohida eʼtibor qaratildi.
Yig‘ilish yakunida COOMETga aʼzo davlatlar o‘rtasidagi hamkorlikni yanada mustahkamlash, qo‘shma loyihalar samaradorligini oshirish hamda o‘lchashlarning yagona birlik tizimini xalqaro talablar asosida rivojlantirishga qaratilgan ustuvor yo‘nalishlar belgilab olindi.
O‘zbekiston milliy metrologiya institutining COOMET EBQ faoliyatidagi ishtiroki xalqaro hamkorlikni mustahkamlash, milliy metrologiya tizimi salohiyatini oshirish hamda O‘zbekiston Respublikasining o‘lchash imkoniyatlarini jahon miqyosida yanada keng tanitishga xizmat qiladi.
🟢Yig‘ilish doirasida yana bir muhim natija qayd etildi. Ilk bor O‘zbekiston vakillari COOMET tarkibiy organlariga rahbar etib saylandilar. Xususan, Azamat Taubaldiyev TQ 1.9 “Ionlashtiruvchi nurlanishlar va radioaktivlik” texnik qo‘mitasi raisi, Alisher Botirov esa IG 1.6.6 “Sarf o‘lchash” ishchi guruhi raisi etib saylandi.
🟡Mazkur natijalar o‘zbekistonlik mutaxassislarning yuqori salohiyati, kasbiy mahorati va xalqaro metrologiya hamjamiyatidagi obro‘-e’tiborini namoyon etib, ularga bo‘lgan yuksak ishonchning amaliy ifodasi bo‘ldi.
COOMET doirasidagi faol ishtirok va rahbarlik lavozimlariga saylanish O‘zbekistonning xalqaro metrologiya maydonidagi mavqeini yanada mustahkamlash, ilg‘or tajribalarni joriy etish hamda sohadagi xalqaro hamkorlikni yangi bosqichga olib chiqishga xizmat qiladi.
Ma’lumot uchun, COOMET Qo‘mitasining navbatdagi yig‘ilishi Qozog‘iston Respublikasida bo‘lib o‘tadi.