Vazirlar Mahkamasi huzuridagi O'zbekiston texnik jihatdan tartibga solish agentligi

✅Joriy yilning 27–29-may kunlari Shenchjen shahrida 4-Jahon avtomobil standartlari va innovatsion konferensiyasi — WASIC bo‘lib o‘tdi. Unda O‘zbekiston Texnik jihatdan tartibga solish agentligi mutaxassislari faol ishtirok etib, soha bo‘yicha taqdimot bilan qatnashdilar.

✅Tadbir davomida avtomobilsozlik sanoatida xalqaro standartlarni joriy etish, sifat menejmenti tizimlarini takomillashtirish, inson resurslarini boshqarish hamda kadrlar salohiyatini oshirish masalalari muhokama qilindi. Xususan, IATF 16949 avtomobil sanoati sifat menejmenti tizimi standartini amaliyotga joriy etish va global avtomobil sektorining barqaror rivojlanishini ta’minlashga qaratilgan ilg‘or yondashuvlar yuzasidan fikr almashildi.
 

✅Shuningdek, konferensiya doirasida Agentlik mutaxassislari tomonidan O‘zbekistonda texnik jihatdan tartibga solish, standartlashtirish, metrologiya va avtomobil sanoatini rivojlantirish yo‘nalishlarida amalga oshirilayotgan islohotlar hamda xalqaro hamkorlik istiqbollari haqida taqdimot qilindi.

✅Tadbir davomida Xitoyning avtomobilsozlik va standartlashtirish sohasidagi ilg‘or tajribasi bilan yaqindan tanishilib, manfaatdor tomonlar o‘rtasida hamkorlik aloqalarini yanada kengaytirish masalalari ko‘rib chiqildi.