Oʻzbekiston Respublikasi Transport vazirligi

O‘zbekiston Respublikasi Prezidentining 2025-yil 27-yanvardagi "O‘zbekiston Respublikasining transport-logistika tizimini yanada rivojlantirish chora-tadbirlari to‘g‘risida"gi PQ– 28-sonli qarori 21-bandida belgilangan topshiriq ijrosi doirasida tashkil etilgan uchrashuvda avtomobil transportida yuklarni xalqaro tashishda  yuzaga kelishi mumkin bo‘lgan xavf-xatarlarda sug‘urtalashning ahamiyati va afzalliklari, hamda milliy tashuvchilar orasida sug‘urta madaniyatini oshirish masalalariga alohida to‘xtalib o‘tildi.

Zero, xalqaro yuk tashuvlari jarayonida ko‘plab xavf-xatarlar, jumladan yukning shikastlanishi, o‘g‘irlik, tabiiy ofatlar, baxtsiz hodisalar va kutilmagan kechikishlar yuzaga kelishi mumkin. Ushbu jarayonda sug‘urtalashning asosiy maqsadi – yukning xavfsizligi va o‘z vaqtida yetkazib berilishiga ta’sir qilishi mumkin bo‘lgan kutilmagan holatlar yuzaga kelganda kompaniyalarning moliyaviy yo‘qotishlarini minimallashtirishga yordam berishdan iboratdir.

Uchrashuvda sug‘urta kompaniyalari mutaxassislari sug‘urta turlari, ularning o‘ziga xos jihatlari to‘g‘risidagi taqdimotlar bilan ishtirok etishdi.  

Shuningdek, Transport va logistikani rivojlantirish muammolarini o‘rganish markazi mutaxassislari mamlakatimizning transport-logistika tizimini raqamlashtirish doirasida yuk tashuvlari shaffofligi va samaradorligini oshirish maqsadida ishga tushirilgan E-logistika raqamli platformasi to‘g‘risida batafsil ma’lumot berishdi.

Mazkur platforma orqali yuk tashuvlari va logistika xizmatlari to‘liq raqamlashtirilgan. E-logistika platformasi yuk jo‘natuvchilar, tashuvchilar va qabul qiluvchilar uchun xarajatlarni kamaytirish, tashuv jarayonlarini tezlashtirish va logistika xizmatlari sifatini yaxshilashga imkon beradi.