Xitoy Eksimbanki tomonidan moliyalashtirilayotgan loyihalar muhokama etildi
2025-04-11 11:00:00 / Yangiliklar
Toshkent shahar transport va yo‘l-transport infratuzilmasini rivojlantirish bosh boshqarmasi hamda “Toshshahartransxizmat” AJ rahbarlari ishtirokida bo‘lib o‘tgan uchrashuvda Toshkent shahri uchun 200 dona elektrobuslar xaridi loyihasini moliyalashtirish uchun Eksimbank tomonidan kredit ajratilishi bilan bog‘liq masalalar atroflicha muhokama etildi.
Eslatib o‘tamiz, "O‘zbekiston – 2030" strategiyasining "Atrof-muhitni asrash va yashil iqtisodiyot yili"da amalga oshirishga oid davlat dasturi" doirasida iqlim o‘zgarishiga moslashish, uglerod neytralligiga erishish, “yashil loyihalar”ni amalga oshirish maqsadida hamda O‘zbekiston Respublikasi Prezidentining va Vazirlar Mahkamasining tegishli qarorlariga muvofiq, Toshkent shahri jamoat transportini rivojlantirish yo‘nalishida 2025-yilda 200 dona elektrobuslar va ular uchun quvvatlash uskunalari xaridi loyihasi amalga oshirilmoqda.
Shuningdek, uchrashuv davomida Nukus shahri va viloyat markazlari jamoat transporti uchun 1000 dona siqilgan tabiiy gazda harakatlanuvchi katta sig‘imli avtobuslar xaridi masalalarini jadallashtirish bilan bog‘liq jihatlar ko‘rib chiqildi.
Muzokaralar yakunida, birgalikda amalga oshirilayotgan loyihalar doirasida o‘zaro hamkorlikni yanada rivojlantirish yuzasidan kelgusidagi qadamlar belgilab olindi.