Oʻzbekiston Respublikasi Transport vazirligi

O‘zbekiston Respublikasi transport vaziri Ilhom Maxkamov O‘zbekiston – Amerika Qo‘shma Shtatlari biznes-forumining “Energetika va transport infratuzilmasi” mavzusidagi strategik panel sessiyasida nutq so‘zladi.

Vazir o‘z nutqida mamlakatimiz transport-logistika tizimini rivojlantirish, xalqaro transport yo‘laklaridagi salohiyatni to‘liq ishga solish hamda sohaga xorijiy investitsiyalarni jalb etish borasida amalga oshirilayotgan ishlar va istiqbolli loyihalarga alohida to‘xtaldi.

Vazir O‘zbekiston va AQSH o‘rtasida transport sohasidagi hamkorlik uzoq yillik tarixga ega ekanligini qayd etib, 1998-yilda O‘zbekiston MDH mamlakatlari orasida birinchi bo‘lib AQSH bilan “Ochiq osmon” to‘g‘risidagi bitimni imzolaganligi va bugungi kunda Toshkent – Nyu-York yo‘nalishida to‘g‘ridan to‘g‘ri aviaqatnovlar amalga oshirilayotganligini ta’kidladi. Shuningdek, “Uzbekistan Airways” aviakompaniyasi tomonidan 22 ta Boeing 787 Dreamliner samolyotiga buyurtma berilgani ushbu hamkorlikning muhim natijasi ekanligini bildirdi.

I.Maxkamov transport va logistikani Amerika kompaniyalari uchun eng istiqbolli yo‘nalishlardan biri sifatida e’tirof etib, hamkorlarni Yangi Toshkent xalqaro aeroporti qurilishi, havo kemalariga texnik xizmat ko‘rsatish hamda samolyotlarni yuk tashishga moslashtirish loyihalarida ishtirok etishga taklif qildi.

Shuningdek, vazir O‘zbekistonning xalqaro transport yo‘laklari kesishmasidagi strategik o‘rniga alohida e’tibor qaratib, Xitoy – Qirg‘iziston – O‘zbekiston temir yo‘li hamda yangi avtomobil va temir yo‘l infratuzilmasi loyihalari mamlakatimizning tranzit imkoniyatlarini kengaytirishda muhim ahamiyat kasb etishini ta’kidladi.

Qayd etilganidek, 2027-yilda Buxoro, Surxondaryo va Toshkent viloyatlarida zamonaviy logistika markazlarini tashkil etish rejalashtirilgan. Mazkur markazlar yuklarni saqlash, qayta ishlash va taqsimlash xizmatlarini rivojlantirish, xalqaro savdo aloqalarini kengaytirish hamda yangi investitsiyalarni jalb etish uchun qo‘shimcha imkoniyatlar yaratadi.

O‘zbekiston har yili katta hajmdagi meva-sabzavot mahsulotlarini eksport qiladi. Shu bois zamonaviy sovutgichli omborlar va tezkor yetkazib berish tizimlarini rivojlantirish eksport salohiyatini oshirishda muhim o‘rin tutadi. Bu yo‘nalishda amerikalik kompaniyalar uchun ham investitsiya va texnologik hamkorlik imkoniyatlari mavjud.

Amerikalik investorlar logistika markazlarini moliyalashtirish, qurish va boshqarish, omborlarni avtomatlashtirish, yuklarni kuzatish tizimlari hamda raqamli platformalarni joriy etish, shuningdek, xalqaro boshqaruv tajribasi va standartlarini tatbiq qilishda ishtirok etishga taklif qilindi. Mazkur markazlardan AQSH kompaniyalari mahsulotlarini mintaqa bo‘ylab taqsimlash uchun ham foydalanish mumkin.

Ilhom Maxkamov xalqaro standartlarga javob beradigan logistika markazlari uchun qulay sharoitlar yaratish, jumladan, 2040-yilgacha mol-mulk va yer soliqlaridan ozod etish mexanizmini joriy etish rejalashtirilayotganini qayd etdi.

Vazir amerikalik investorlarni transport infratuzilmasi loyihalarini moliyalashtirish, qurish va boshqarish, shuningdek, logistika jarayonlariga ilg‘or texnologiyalar va raqamli yechimlarni joriy etishda faol hamkorlik qilishga chaqirdi.