Oʻzbekiston Respublikasi Transport vazirligi

Konferensiyaning “O‘zbekistonda samarali logistika tarmog‘ini barpo etish sari” mavzusidagi maxsus sessiyasida O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazi direktori Bekzod Xolmatov “O‘zbekistonda logistika tarmog‘ini rivojlantirish bo‘yicha hukumat qarashlari” mavzusida taqdimot bilan ishtirok etdi.

Taqdimot davomida mamlakatda logistika sohasini rivojlantirishga qaratilgan davlat siyosati, transport-logistika markazlari va quruqlik portlari tarmog‘ini kengaytirish borasida amalga oshirilayotgan ishlar hamda 2030-yilgacha mo‘ljallangan strategik yo‘nalishlar va sohada davlat tomonidan berilayotgan imtiyozlar haqida ma’lumot berildi.

Xususan, 2021 – 2026-yillarda O‘zbekistonda logistika markazlari va quruqlik portlari tarmog‘ini rivojlantirish bo‘yicha qator muhim ishlar amalga oshirildi. Shu davrda O‘zbekiston BMTning Osiyo va Tinch okeani uchun iqtisodiy va ijtimoiy komissiyasi (ESKATO)ning Xalqaro quruqlik portlari to‘g‘risidagi hukumatlararo bitimiga qo‘shildi.

Shuningdek, transport-logistika sohasini 2030-yilgacha rivojlantirish konsepsiyasi ishlab chiqilib, logistika markazlariga qo‘yiladigan namunaviy talablar belgilandi.

ESKATO bilan hamkorlikda O‘zbekistonda quruqlik portlari tarmog‘ini rivojlantirish bo‘yicha qo‘shma tadqiqotlar o‘tkazildi. 2025-yilda respublikadagi 80 dan ortiq logistika obyektlari namunaviy talablar asosida xatlovdan o‘tkazildi. Natijada ularning 27 tasi belgilangan talablarga javob berishi aniqlanib, tegishli reyestrga kiritildi. Ushbu markazlarning 24 tasi ESKATOning “Xalqaro quruqlik portlari” ro‘yxatidan o‘rin oldi.

Logistika markazlari faoliyatini baholash va ularning reytingini yuritish amaliyoti ham joriy etildi.

Ayni paytda mamlakatda umumiy maydoni 739 gektar bo‘lgan 17 ta logistika markazini tashkil etish loyihalari amalga oshirilmoqda. Shundan 462 gektari yangi, 277 gektari esa davom etayotgan loyihalarga to‘g‘ri keladi. Bundan tashqari, Xonobod, Yangiyo‘l, Ohangaron, Olot va Termiz tumanlarida har biri 50 gektargacha bo‘lgan yangi ixtisoslashtirilgan zonalar va logistika markazlarini tashkil etish rejalashtirilgan.

Kelgusi bosqichda logistika tizimini raqamlashtirishga alohida e’tibor qaratiladi. 2030-yilgacha barcha transport-logistika markazlarida TOS, WMS, ANPR kabi zamonaviy raqamli tizimlarni joriy etish hamda ularni yagona “E-Logistika” milliy platformasiga integratsiya qilish ko‘zda tutilgan. Taqdimotda, shuningdek, O‘zbekistonda zamonaviy 3PL logistika operatorlarini rivojlantirish masalalariga ham alohida ta’kidlab o‘tildi.

2027-yilda xalqaro moliya institutlari hamda Yevropa Ittifoqining “Global Gateway” strategiyasi doirasida transport-logistika markazlarini rivojlantirish uchun 200 million dollardan ortiq imtiyozli kredit resurslarini jalb qilish rejalashtirilmoqda.

Mazkur chora-tadbirlar O‘zbekistonning transport-logistika salohiyatini yanada oshirish, xalqaro transport yo‘laklaridagi ishtirokini kengaytirish hamda mamlakatda zamonaviy va samarali logistika tarmog‘ini shakllantirishga xizmat qilishi ta’kidlandi.