Oʻzbekiston Respublikasi Transport vazirligi

Muzokaralar chog‘ida tomonlar transport sohasidagi O‘zbekiston-Xitoy hamkorligining bugungi holati va uni yanada rivojlantirish istiqbollarini muhokama etishdi.

Xususan, ikki mamlakat o‘rtasida xalqaro avtomobil tashuvlarini yanada kengaytirish, milliy tashuvchilar uchun yanada qulay sharoitlar yaratish, yuk tashish hajmini ko‘paytirish, shuningdek, transport-logistika aloqalari samaradorligini oshirish masalalariga alohida e’tibor qaratildi.

Bundan tashqari, tomonlar fuqaro aviatsiyasi sohasidagi hamkorlikni yanada rivojlantirish istiqbollarini, jumladan, O‘zbekiston va Xitoy shaharlari o‘rtasida aviaqatnovlar sonini oshirish, parvozlar geografiyasini kengaytirish hamda yo‘lovchi va yuk aviatashuvlari uchun qo‘shimcha imkoniyatlar yaratish masalalarini ko‘rib chiqdilar.

Uchrashuvning asosiy yakuni sifatida O‘zbekiston Respublikasi Hukumati va Xitoy Xalq Respublikasi Hukumati o‘rtasida xalqaro avtomobil qatnovi to‘g‘risidagi Bitimga o‘zgartirish va qo‘shimchalar kiritish to‘g‘risidagi Bayonnoma imzolandi.

Ushbu hujjatning imzolanishi ikki davlat o‘rtasida xalqaro avtomobil tashuvlarining shartnomaviy-huquqiy bazasini yanada takomillashtirish va avtomobil qatnovini rivojlantirish uchun zamonaviy shart-sharoitlar yaratishga qaratilgan.

Bayonnoma qoidalarini amalga oshirish O‘zbekiston va Xitoy tashuvchilarining xalqaro tashuvlarni amalga oshirish imkoniyatlarini kengaytirish, mavjud transport yo‘nalishlaridan foydalanish samaradorligini oshirish, ma’muriy to‘siqlarni qisqartirish hamda o‘zaro va tranzit yuk oqimlarini ko‘paytirish uchun qo‘shimcha sharoitlar yaratish imkonini berishi kutilmoqda.

Hujjat, shuningdek, O‘zbekiston va Xitoy o‘rtasidagi transport bog‘liqligini mustahkamlash, Xitoyni Markaziy Osiyo mamlakatlari va boshqa mintaqalar bilan bog‘laydigan xalqaro transport yo‘laklarini yanada rivojlantirishga xizmat qiladi.

Uchrashuv yakunida tomonlar amaliy hamkorlikni izchil kengaytirishdan o‘zaro manfaatdor ekanliklarini tasdiqladilar va erishilgan kelishuvlarni amalga oshirish bo‘yicha birgalikdagi ishlarni davom ettirishga kelishib oldilar.