Avtobus haydovchilarining mehnatiga haq to‘lash va rag‘batlantirish tizimi yuzasidan ochiq muloqot o‘tkazildi
2026-09-22 16:00:00 / Yangiliklar
Tadbir ochiqlik va shaffoflik tamoyillari asosida, ochiq muloqot shaklida o‘tkazildi. Unda 15 dan ortiq ommaviy axborot vositalari vakillari, jurnalist va blogerlar, Transport vazirligi huzuridagi jamoatchilik kengashi a’zolari hamda jamoatchilik faollari, 100 nafardan ortiq avtobus haydovchilari bevosita ishtirok etdi.
Tadbirning asosiy maqsadi — avtobus haydovchilarining mehnatiga haq to‘lash tizimi, oylik ish haqining shakllanishi, rag‘batlantiruvchi to‘lovlarni belgilash mezonlari hamda ushbu yo‘nalishda jamoatchilikni qiziqtirayotgan masalalarga aniqlik kiritishdan iborat bo‘ldi.
Ish haqi hisoblanishi yuzasidan tushuntirishlar
Matbuot anjumanida haydovchilarning oylik ish haqi qanday tartibda shakllanishi, uning tarkibiy qismlari hamda ish haqi miqdoriga ta’sir qiluvchi omillar haqida batafsil ma’lumot berildi.
Shuningdek, haydovchilarga beriladigan rag‘batlantiruvchi to‘lovlar qaysi mezonlar asosida hisoblanishi, ularning xizmat sifati, mehnat intizomi va belgilangan talablarning bajarilishi bilan bog‘liq jihatlari tushuntirib berildi. Haydovchilarning ish haqi kamayishiga sabab bo‘lishi mumkin bo‘lgan holatlar ham alohida muhokama qilinib, amaldagi tartiblar yuzasidan izohlar berildi.
Haydovchilar savollariga bevosita javob oldi
Ochiq muloqot davomida 100 nafardan ortiq avtobus haydovchilari o‘zlarini qiziqtirgan masalalar yuzasidan mutasaddilarga bevosita savollar bilan murojaat qildi. Haydovchilar tomonidan ish haqi hisob-kitobi, rag‘batlantirish tizimi, mehnat faoliyatini baholash, ish sharoitlari va boshqa masalalar yuzasidan fikr va takliflar bildirildi.
Har bir murojaat bo‘yicha tegishli mutasaddilar tomonidan tushuntirishlar berilib, haydovchilarni qiziqtirgan savollarga ochiq javob qaytarildi. Ijtimoiy tarmoqlardagi murojaatlar ham muhokama qilindi.
Shuningdek, so‘nggi kunlarda ijtimoiy tarmoqlarda tarqalayotgan ayrim avtobus haydovchilarining e’tirozlari aks etgan videolavhalar yuzasidan ham batafsil izoh berildi. Mazkur holatlar bo‘yicha mavjud vaziyat, ish haqi hisob-kitoblari va amaldagi mehnat hamda rag‘batlantirish tartiblari yuzasidan OAV vakillari va jamoatchilikka tushuntirishlar taqdim etildi.
OAV va blogerlar bilan ochiq muloqot
Matbuot anjumanida 15 dan ortiq OAV vakillari va blogerlar ham faol ishtirok etib, mavzu yuzasidan o‘zlarini qiziqtirgan savollarni yo‘lladi. Jurnalistlar tomonidan haydovchilarning ish haqi, rag‘batlantirish tizimi, mehnat sharoitlari, xizmat sifati va sohada mavjud muammolar yuzasidan savollar berildi. Mutasaddilar tomonidan berilgan savollarga batafsil javoblar taqdim etildi.
Tadbirning muhim jihati shundaki, unda masala faqat mutasaddilar va OAV vakillari o‘rtasida emas, balki bevosita avtobus haydovchilari ishtirokida muhokama qilindi. Bu esa haydovchilarning o‘zlarini qiziqtirgan masalalarni bevosita ko‘tarish, savollariga javob olish hamda mavjud muammolar yuzasidan ochiq fikr almashish imkonini berdi.