Oʻzbekiston Respublikasi Transport vazirligi

Uchrashuv davomida havo kemalarini texnik qo‘llab-quvvatlash, aviatexnikaga texnik xizmat ko‘rsatish va uni ta’mirlash sohasidagi kompetensiyalarni rivojlantirish masalalari, shuningdek, O‘zbekistonning 2030-yilgacha havo kemalari parkini ikki baravarga oshirish rejalarini inobatga olgan holda uzoq muddatli hamkorlikni rivojlantirish istiqbollari muhokama qilindi.
 
 

Xususan, Airbus A320 ceo/neo va Boeing 787 havo kemalari butlovchi qismlarini texnik qo‘llab-quvvatlash to‘g‘risidagi kelishuvni 2035-yilgacha uzaytirishga, shuningdek, LEAP-1A va CFM56-5B avia dvigatellariga texnik xizmat ko‘rsatish bo‘yicha hamkorlikni yanada rivojlantirishga alohida e’tibor qaratildi.
 
 

Kelgusi 10 yillik hamkorlik istiqbollari, jumladan, “Uzbekistan Airways Technics” uchun texnik kompetensiyalarni rivojlantirish va imkoniyatlarni kengaytirish masalalari alohida ko‘rib chiqildi.
 
 

Muzokaralar yakunida transport vaziri I. Maxkamov “Lufthansa Technik” va Toshkent davlat transport universiteti o‘rtasida hamkorlik yo‘lga qo‘yish, xususan, aviatsiya-texnika fakulteti talabalari uchun stajirovkalar tashkil etish, shuningdek, fuqaro aviatsiyasi sohasida qo‘shma ta’limiy va kasbiy dasturlarni amalga oshirish imkoniyatlarini ko‘rib chiqishni taklif qildi.
 
 

Ushbu yo‘nalishning rivojlanishi yuqori malakali aviatsiya mutaxassislarini tayyorlashga, xalqaro tajribani joriy etishga va O‘zbekiston aviatsiya sohasining kadrlar salohiyatini yanada mustahkamlashga xizmat qilishi bilan ahamiyatlidir.
 
 

Ma’lumot uchun: Lufthansa Technik (LHT) — aviatransportga texnik xizmat ko‘rsatishga ixtisoslashgan nemis kompaniyasi bo‘lib, u Lufthansa aviakompaniyasining sho‘ba korxonasi hisoblanadi.
 
 

Lufthansa Technik havo kemalariga texnik xizmat ko‘rsatish bo‘yicha dunyodagi beshta eng yirik kompaniya qatoriga kiradi. Uning faoliyati aviatransportga texnik xizmat ko‘rsatish, uni ta’mirlash va modernizatsiya qilish, shuningdek, butlovchi qismlar ishlab chiqarishni o‘z ichiga oladi.