Jamoat transportida "bepul" safar qilayotganlarga qarshi nazorat tadbirlari kuchaytirildi
2026-09-09 15:00:00 / Yangiliklar
Avval xabar berilganidek, 2026-yil 1-sentabrdan boshlab brutto-shartnoma asosida faoliyat yuritayotgan barcha shahar avtobuslarida yo‘lkira haqini to‘lashning yangi tartibi joriy etildi. Yangi tartibga ko‘ra, yo‘lovchilar avtobusga chiqishi bilan yo‘lkira haqini to‘lashlari shart.
“Toshkent shahar yo‘lovchi tashishni monitoring va nazorat qilish” davlat muassasasi nazoratchilari tomonidan avtobuslarda to‘lov madaniyatini oshirishga qaratilgan kuchaytirilgan nazorat reyd tadbirlari olib borilmoqda.
2026-yil avgust oyida yo‘lkira haqini to‘lamasdan harakatlangan 10 843 nafar yo‘lovchiga nisbatan O‘zbekiston Respublikasi Ma’muriy javobgarlik to‘g‘risidagi kodeksining 144-moddasi 5-qismiga asosan ma’muriy bayonnomalar rasmiylashtirilgan. Bu o‘rtacha hisobda bir kunda 350 ta holatni tashkil etgan.
2026-yil sentabr oyining 8-sanasiga qadar esa mazkur modda asosida yo‘lkira haqini to‘lamasdan harakatlangan 4 696 nafar yo‘lovchiga nisbatan ma’muriy bayonnomalar rasmiylashtirilgan. Bu o‘rtacha hisobda bir kunda 587 ta holatni tashkil etadi.
Mazkur ko‘rsatkichlar tahlili shuni ko‘rsatadiki, sentabr oyining dastlabki 8 kunida bir kunlik o‘rtacha rasmiylashtirilgan ma’muriy bayonnomalar soni avgust oyidagi o‘rtacha ko‘rsatkichga nisbatan 237 taga, ya’ni qariyb 68 foizga oshgan.