Mamlakatimizda amalga oshirilayotgan islohotlar doirasida davlat organlari rahbarlarining aholi bilan ochiq muloqoti, ularning muammo va takliflarini bevosita o‘rganishi hamda amaliy yechimlar topishiga alohida e’tibor qaratilmoqda. 

Prezidentimiz tomonidan ilgari surilgan “Xalq davlat idoralariga emas, davlat idoralari xalqqa xizmat qilishi kerak” tamoyili asosida transport sohasida ham murojaatlarni manzilli ko‘rib chiqish, ularning kelib chiqish sabablarini tahlil qilish va takroriy murojaatlarning oldini olish bo‘yicha tizimli ishlar amalga oshirilmoqda.

Mazkur vazifalar ijrosini ta’minlash maqsadida Transport vazirligiga 2026 yil birinchi yarim yilligida kelib tushgan jismoniy va yuridik shaxslarning murojaatlari sohalar va hududlar kesimida tahlil qilindi. Tahlil davomida murojaatlarning mazmuni, hududlar bo‘yicha taqsimoti, dolzarb masalalar hamda takroriy murojaatlar sabablari o‘rganildi.

Transport vazirliligiga 2026 yil yanvar – iyun oylari davomida kelib tushgan murojaatlar soni 1 114 tani tashkil etib, o‘tgan yilning shu davriga (2025-yilda 2 037 ta) nisbatan 923 taga yoki 45,31% ga kamaygan.

Jami kelib tushgan murojaatlar: 

Hisobot davrida jami 1 114 ta murojaat kelib tushgan. Ijobiy hal qilingan 498 ta (44.7 %), huquqiy ma’lumot berish orqali hal qilingan 595 ta (53.4 %), tushuntirish berilgan 9 ta (0.8 %), uzoq muddatli nazoratga olingan 3 ta (0.3 %), tugatilgan 8 ta (0.7 %), rad etilgan 1 ta (0.09 %) ni tashkil etadi. Jami ijobiy natija bilan ko‘rib chiqilgan murojaatlar soni 956 tani tashkil etib, qanoatlantirilganlik darajasi 85.8% ni tashkil etgan.

Takroriy murojaatlar tahlili

Jami 9 ta takroriy murojaat qayd etilgan bo‘lib, bu umumiy murojaatlarning 0.80 % ga teng. Takroriy murojaatlarning asosiy qismi murojaatchilar tomonidan ko‘rilgan choralardan qoniqmaslik yoki masalalarning to‘liq hal etilmaganligi bilan izohlanadi.

Hududlar kesimida murojaatlar tahlili 

Toshkent shahri 293 ta (26.3 %), Toshkent viloyati 182 ta (16.3%), Farg‘ona viloyati 114 ta (10.2 %), Qoraqalpog‘iston Respublikasi Transport vazirligi 99 ta (8.8 %),  Xorazm viloyati 77 ta (6.9 %), Buxoro viloyati 52 ta (4.7 %), Qashqadaryo viloyati 48 ta (4.3 %), Surxondaryo viloyati 45 ta (4.0 %), Jizzax viloyati 42 ta (3.8 %),  Namangan viloyati 42 ta (3.8 %),  Samarqand viloyati 38 ta (3.4 %), Sirdaryo viloyati 30 ta (2.7 %), Navoiy viloyati 29 ta (2.6%),  Andijon viloyati 15 ta (1.3 %), Chet el 8 tani  (0.7 %) tashkil etadi.

2025–2026 yillar taqqoslama tahliliga ko‘ra, hududlar kesimida murojaatlar sonining sezilarli kamayishi kuzatilganligini ko‘rmoqdamiz.

2025-yilda eng ko‘p murojaatlar Toshkent shahri (382 ta), Namangan viloyati (218 ta), Farg‘ona viloyati (195 ta) hamda Toshkent viloyatidan (174 ta) kelib tushgan bo‘lsa, 2026-yilda mazkur hududlarda murojaatlar sonining kamayishi kuzatilmoqda. 

Transport sohalari bo‘yicha murojaatlar tahlili shuni ko‘rsatadi.

Murojaatlar tahlilida, transport sohasida aholi va tadbirkorlarni eng ko‘p qiynayotgan masalalar avtomobil yo‘llari, jamoat transporti, litsenziyalash, temir yo‘l va havo transporti xizmatlari bilan bog‘liqdir.

1. Jamoat transporti infratuzilmasi, yo‘nalish ochish va tenderlar masalasi– 320 ta (28,7%).  

2. Yuk tashish, logistika va litsenziyalash – 198 ta (17,7%).  

3. Avtomobil yo‘llarini qurish, rekonstruksiya qilish, ta’mirlash va saqlash va boshqa masalalar – 179 ta (16,1%). 

4. Havo transporti sohasiga oid murojaatlar – 40 ta (3,6%). 

5. Temir yo‘l transporti sohasiga oid murojaatlar – 11 ta (1,0%). 

6. Turli masalalar – 366 ta (32,9%)

2026-yil  birinchi yarim yilligida Transport vazirligi tizimiga kelib tushgan murojaatlar tahlili transport sohasida aholining asosiy e’tirozlari jamoat transporti, yo‘l infratuzilmasi, litsenziyalash, temir yo‘l va havo transporti xizmatlari atrofida shakllanayotganini ko‘rsatmoqda. 

Kelgusida murojaatlar bilan ishlashda asosiy e’tibor takroriy murojaatlarni kamaytirish, ijro muddatlariga qat’iy rioya etish, joylardagi tizimli muammolarni manzilli bartaraf etish hamda aholining transport xizmatlaridan qoniqish darajasini oshirishga qaratilishi lozim.