Oʻzbekiston Respublikasi Transport vazirligi

Mazkur tadbir Sanoat kooperatsiyasi va davlat xaridlari agentligi, O‘zbekiston Respublikasi Transport vazirligi, Samarqand viloyati hokimligi hamda transport tarmog‘ining yirik davlat buyurtmachilari va korxonalari hamkorligida tashkil etildi.

Ko‘rgazmaning asosiy maqsadi transport sohasida mahalliy ishlab chiqarishni kengaytirish, sanoat kooperatsiyasini rivojlantirish, import o‘rnini bosuvchi mahsulotlar ishlab chiqarishni rag‘batlantirish hamda davlat buyurtmachilari va ishlab chiqaruvchilar o‘rtasida to‘g‘ridan-to‘g‘ri hamkorlikni yo‘lga qo‘yishdan iborat bo‘ldi.

Ko‘rgazmada transport tarmog‘ining 5 ta yirik korxonasi, 80 dan ortiq mahalliy ishlab chiqaruvchi ishtirok etib, 2 mingdan ziyod mahsulot va texnologik yechimlar namoyish etildi. Ekspozitsiyalarda temir yo‘l, fuqaro aviatsiyasi, avtomobil yo‘llari, shahar transporti va logistika yo‘nalishlari uchun ishlab chiqarilgan zamonaviy uskunalar, ehtiyot qismlar, innovatsion texnologiyalar, ilmiy ishlanmalar hamda istiqbolli investitsiya loyihalari taqdim etildi.

Ikki kun davom etgan ko‘rgazmada 1 500 nafardan ortiq tadbirkor, ishlab chiqaruvchi, investor, davlat buyurtmachilari, ilmiy muassasalar va moliya institutlari vakillari ishtirok etdi. Tadbir transport sanoati uchun nafaqat mahsulotlar namoyishi, balki tajriba almashish, yangi hamkorlik aloqalarini o‘rnatish va istiqbolli loyihalarni muhokama qilish maydoniga aylandi.

Ko‘rgazmaning eng muhim jihatlaridan biri shundaki, transport sohasining yirik buyurtmachilari o‘zlarining joriy va istiqboldagi xarid ehtiyojlari, 2026-yil va undan keyingi davrga mo‘ljallangan xarid rejalari, mahsulotlarga qo‘yiladigan texnik talablar, sifat mezonlari hamda yillik ehtiyoj hajmi haqida batafsil ma’lumot berdi. Bu esa mahalliy ishlab chiqaruvchilarga bozor talabini chuqur o‘rganish, ishlab chiqarishni diversifikatsiya qilish, yangi mahsulotlarni o‘zlashtirish va davlat buyurtmalarida faol ishtirok etish uchun muhim imkoniyat yaratdi.

Shuningdek, ko‘rgazma doirasida bugungi kunda import qilinayotgan, mahalliylashtirilgan hamda kelgusida mamlakatimizda ishlab chiqarilishi tavsiya etilayotgan mahsulotlar alohida yo‘nalishlar kesimida namoyish etildi. Natijada tadbirkorlar import o‘rnini bosuvchi mahsulotlarni ishlab chiqarish bo‘yicha istiqbolli loyihalarni shakllantirish, yangi kooperatsiya aloqalarini yo‘lga qo‘yish va investitsiyalarni jalb etish yuzasidan amaliy tavsiyalar oldilar.

Tadbir yakunlariga ko‘ra, davlat xaridlari doirasida 10 mingdan ortiq shartnoma imzolandi. Ularning umumiy qiymati 714 milliard so‘mni tashkil etdi. Mazkur kelishuvlar transport tarmog‘ida mahalliy korxonalar ishtirokini yanada kengaytirish, ishlab chiqarish quvvatlarini oshirish, yangi ish o‘rinlarini yaratish va mahalliy kontent ulushini ko‘paytirish uchun muhim iqtisodiy asos bo‘lib xizmat qiladi.

Ko‘rgazma yakunida innovatsion yondashuvi, ilg‘or texnologik yechimlari va sanoat kooperatsiyasini rivojlantirishga qo‘shgan hissasi bilan ajralib turgan ishtirokchilar tantanali ravishda taqdirlandi. G‘oliblar “Eng yaxshi innovatsion stend”, “Eng istiqbolli innovatsion startap”, “Eng istiqbolli transport loyihasi”, “Import o‘rnini bosuvchi eng yaxshi loyiha” hamda “Eng samarali sanoat zanjiri loyihasi” nominatsiyalari bo‘yicha e’tirof etildi.

“Milliy sanoat zanjiri” ko‘rgazmasi transport tarmog‘ida mahalliy ishlab chiqaruvchilarni qo‘llab-quvvatlash, sanoat kooperatsiyasini mustahkamlash, innovatsion loyihalarni amaliyotga joriy etish va davlat xaridlarida mahalliy mahsulotlar ulushini oshirish yo‘lidagi muhim qadamlardan biri bo‘ldi. Mazkur platforma kelgusida transport sohasining barqaror rivojlanishi, zamonaviy ishlab chiqarishlarni kengaytirish hamda milliy iqtisodiyotning raqobatbardoshligini yanada oshirishga xizmat qilishi bilan ahamiyatlidir.