O‘zbekiston–Latviya o‘rtasida xalqaro avtomobil tashuvlari bo‘yicha hamkorlik yanada kengaymoqda
2026-07-15 14:30:00 / Yangiliklar
Uchrashuv davomida ikki davlat o‘rtasidagi ikki tomonlama va tranzit avtomobil tashuvlarini rivojlantirish, ruxsatnoma tizimini takomillashtirish, O‘zbekistonning ECMT(Yevropa transport vazirlari konferensiyasi) ko‘p tomonlama ruxsatnoma tizimiga qo‘shilishi, AETR (Xalqaro avtomobil tashuvlarini amalga oshiruvchi transport vositalari ekipajlarining ishiga oid Yevropa bitimi) talablarini amalga oshirish, avtotransport vositalarini texnik ko‘rikdan o‘tkazish hamda chegara nazorati bilan bog‘liq dolzarb masalalar muhokama qilindi.
Muzokaralar yakunida O‘zbekiston milliy tashuvchilari uchun qo‘shimcha ruxsatnoma blankalari ajratilishi bo‘yicha kelishuvga erishildi. Ushbu ruxsatnomalar 2026-yil 10-avgustga qadar tayyorlanib, xalqaro tashuvchilarga taqdim etiladi.
Shuningdek, tomonlar 2027-yil uchun ruxsatnoma blankalari kvotasini ikki barobar oshirish bo‘yicha ham kelishib oldilar. Bu esa milliy tashuvchilarning Latviya va Yevropa Ittifoqi davlatlari yo‘nalishidagi xalqaro yuk tashuvlari imkoniyatlarini yanada kengaytirishga xizmat qiladi.