Yangi Toshkent xalqaro aeroportini qurish va uni ekspluatatsiya qilish bo‘yicha DXSH shartnomasi imzolandi
2026-06-17 18:00:00 / Yangiliklar
Mazkur shartnomaga muvofiq Yangi aeroport 35-yil muddatga davlat-xususiy sheriklik mexanizmlari asosida tashqi boshqaruvga berilib, loyiha Saudiya Arabistoni, Yaponiya va Koreya Respublikasining yetakchi kompaniyalari bilan hamkorlikda amalga oshiriladi.
Yangi aeroport majmuasi 2026-2030-yillar davomida Toshkent viloyatining O‘rta Chirchiq va Quyi Chirchiq tumanlari hududidagi 1 310 gektar maydonda barpo etilib, loyiha doirasida dastlabki bosqichda qariyb 3 milliard dollar xorijiy investitsiyalar jalb qilinishi rejalashtirilgan.
Loyiha doirasida amaldagi aeroport terminalidan 4 barobar katta bo‘lgan yangi zamonaviy yo‘lovchi terminali qad rostlaydi hamda dastlabki bosqichda yiliga 20 million yo‘lovchiga xizmat ko‘rsatish imkoniyatiga ega bo‘ladi, istiqbolda esa ushbu ko‘rsatkich 46 millionga yetadi.
Yo‘lovchilarga qulayliklar yaratish va ularning xavfsizligini ta’minlash maqsadida yangi terminalda ilg‘or axborot texnologiyalariga asoslangan tezkor ro‘yxatdan o‘tkazish, xavfsizlikni ta’minlash va yukni qayta ishlash tizimlari joriy etiladi.
Shuningdek, yo‘lovchilar oqimini tez va qulay tarzda yo‘naltirish maqsadida jami 40 dan ortiq teleskopik traplar hamda 160 dan ortiq havo kemalari turargohlari tashkil etiladi.
Aeroportda qurilayotgan 2 ta uchish-qo‘nish yo‘lagida bir vaqtning o‘zida samolyotlarning uchishi va qo‘nishi uchun imkoniyat yaratiladi. Buning natijasida, soatiga 30 dan ortiq uchish-qo‘nish operatsiyalari amalga oshiriladi. Eng ilg‘or navigatsiya, meteorologik va xavfsizlik tizimlari – barcha turdagi havo kemalarini har qanday ob-havo sharoitida qabul qilish imkonini beradi.
Shu bilan birga, aholi va yurtimiz mehmonlarining aeroport hududiga yetib olishi uchun qulay transport yechimlari ishlab chiqilgan bo‘lib, avtomobil yo‘li va mahalliy temir yo‘l qatnovlari orqali poytaxt va viloyatlar bilan uzviy bog‘lanadi.
Mazkur aeroport nafaqat yurtimizning iqtisodiyoti va turizm sohasi rivojiga, balki butun mintaqa aviatsiya xaritasidagi mavqeini mustahkamlashga xizmat qiladi.