Yangi Buxoro aeroportini DXSh asosida qurish va boshqarish bo‘yicha tenderning birinchi bosqichi yakunlandi
2026-06-15 17:00:00 / Yangiliklar
Taqdim etilgan barcha dastlabki malaka arizalari ko‘rib chiqilgach, Idoralararo tender komissiyasi tomonidan dastlabki malaka bosqichidan (RFQ) o‘tgan talabgorlar ro‘yxati tasdiqlandi.
Qayd etish lozimki, mazkur bosqich davomida Buyuk Britaniya, Irlandiya, Daniya, Ispaniya, Italiya, Shveysariya, Belgiya, Polsha, Albaniya, Turkiya, Ozarbayjon, Rossiya, Ukraina, Qozog‘iston, Kanada, Yaponiya, Xitoy, Xindiston, Saudiya Arabistoni, Quvayt, Baxrayn, BAA, Qatar kabi mamlakatlar kompaniyalari va mahalliy korxonalardan 51 nafari loyihaga qiziqish bildirdi.
Texnik, huquqiy va moliyaviy qismlardan iborat uch bosqichli baholash yakunlari bo‘yicha Idoralararo tender komissiyasi tomonidan dastlabki malaka bosqichidan (RFQ) o‘tgan 6 nafar xalqaro kompaniyalar qisqa ro‘yxati shakllantirilib, tenderning ikkinchi bosqichi — takliflar so‘rovida (RFP) qatnashishlariga ruxsat berildi.
Yangi Buxoro xalqaro aeroportini DXSH shartlari asosida qurish va boshqaruvga berish loyihasi “Uzbekistan Airports” AJ tomonidan Transport vazirligi hamda Iqtisodiyot va moliya vazirligi bilan hamkorlikda mamlakat transport infratuzilmasini rivojlantirishga xususiy investitsiyalarni jalb etish strategik ustuvorliklari belgilab berilgan O‘zbekiston Respublikasi Prezidentining 2024-yil 30-avgustdagi “O‘zbekiston Respublikasida 2024–2030-yillarda davlat-xususiy sheriklikni rivojlantirish chora-tadbirlari to‘g‘risida”gi PQ-308-son qarori asosida amalga oshirilmoqda.