Davlat xizmatining shaffofligini ta’minlash, korrupsiyaviy xavf-xatarlarni va kiberjinoyatlarni oldini olish masalalariga bag‘ishlangan yig‘ilish o‘tkazildi
2026-04-24 17:00:00 / Yangiliklar
Unda vazirlik markaziy apparati tarkibiy bo‘linmalari, shuningdek, tizim tashkilotlari rahbar va mas’ul xodimlari ishtirok etib, 2026-yilning I choragida korrupsiyaga qarshi kurashish va uning oldini olish bo‘yicha amalga oshirilgan ishlar hamda kelgusi ustuvor vazifalar muhokama qilindi.
Yig‘ilish davomida korrupsiyaga qarshi kurashish sohasida amalga oshirilayotgan ishlar tahlil qilinib, bu borada profilaktik mexanizmlarni yanada takomillashtirish, tizimli korrupsiyaviy holatlarning oldini olish, davlat organlari faoliyatida ochiqlik siyosatini izchil davom ettirish zarurligi alohida qayd etildi.
Shuningdek, sohada raqamli transformatsiya jarayonlarini jadallashtirish, jumladan, davlat xizmatlarini raqamlashtirish, sun’iy intellekt texnologiyalarini joriy etish orqali inson omilini qisqartirish, shaffoflikni ta’minlash va kiberjinoyatlarga qarshi kurashish masalalariga alohida e’tibor qaratildi. Bu esa o‘z navbatida korrupsiyaviy xavflarni kamaytirish va boshqaruv samaradorligini oshirishga xizmat qilishi ta’kidlandi.
Yig‘ilishda vazirlik va tizim tashkilotlarida korrupsiyaga qarshi kurashishga oid ichki idoraviy hujjatlarni muntazam ravishda qayta ko‘rib chiqish, ularni amalda qo‘llash samaradorligini oshirish, shuningdek xodimlar o‘rtasida huquqiy madaniyatni yuksaltirish muhimligi qayd etildi.
Shu bilan birga, amalga oshirilayotgan ishlar yuzasidan muntazam monitoring olib borish, natijalarni tahlil qilish hamda mas’ul rahbarlarning shaxsiy javobgarligini oshirish zarurligiga urg‘u berildi.
Yig‘ilish yakunida barcha tegishli bo‘linma va tashkilotlar rahbarlariga belgilangan vazifalar ijrosini so‘zsiz ta’minlash, belgilangan muddatlarda tegishli hisobotlarni taqdim etish hamda korrupsiyaga qarshi kurashish bo‘yicha ishlarni yanada kuchaytirish yuzasidan aniq topshiriqlar berildi.