Oʻzbekiston Respublikasi Transport vazirligi

2025-yil 15-yanvar kuni Avtomobil transporti sohasida kadrlar malakasini oshirish va ularni qayta tayyorlash institutida o‘qishni muvaffaqiyatli tamomlaganlik to‘g‘risidagi sertifikatlarni tantanali topshirish marosimi bo‘lib o‘tdi. Kurslar yakunida 20 nafar xotin-qiz "D" toifadagi haydovchilik guvohnomasini olish uchun sertifikatlarga ega bo‘ldi. Tadbirda BMT Taraqqiyot dasturining O‘zbekistondagi vakili Akiko Fudjiya ishtirok etib, bitiruvchilarni tabrikladi va ularning kasbiy faoliyatida muvaffaqiyatlar tiladi.

Eslatib o‘tamiz, Transport vazirligi tashabbusi bilan xotin-qizlar uchun avtobuslarni boshqarish bo‘yicha ilgari amalda bo‘lgan qonuniy cheklovlar olib tashlandi. Bugungi kunda Toshkent shahrida 2 nafar ayol avtobus haydovchisi bo‘lib, shahar yo‘nalishlarida yo‘lovchi tashishni ta’minlamoqda. Ushbu tashabbus O‘zbekiston transport sohasida gender inklyuzivligini mustahkamlash va ayollarning mehnat bozoridagi ishtirokini kengaytirish yo‘lida muhim qadam bo‘lib xizmat qiladi.