O‘zbekiston Respublikasi Investitsiyalar, sanoat va savdo vazirligi

Toshkent xalqaro investitsiya forumi doirasida nufuzli “PwC” xalqaro konsalting kompaniyasi ko‘magida axborot asrida davlat imijini shakllantirish va investitsion jozibadorlikni oshirishga bag‘ishlangan “Raqamli diplomatiya va yumshoq kuch: mamlakatni global muloqotda pozitsiyalash” mavzusida yirik panel sessiyasi bo‘lib o‘tdi.

Tadbir davomida bugungi kunda davlatlar va yirik biznes tuzilmalari o‘zlarining innovatsion yutuqlarini namoyish etish, iqtidorli mutaxassislarni jalb qilish hamda xorijiy investorlarning qaror qabul qilish jarayonlarini qo‘llab-quvvatlash uchun axborot vositalaridan qanday samarali foydalanayotgani chuqur tahlil qilindi. Muloqot ishtirokchilari ijtimoiy tarmoqlar imkoniyatlari, zamonaviy raqamli muloqot strategiyalari va ta’sirchan “storytelling” (hikoya qilish) usullaridan maqsadli foydalanish bo‘yicha aniq amaliy misollar va ilg‘or tajribalar bilan o‘rtoqlashdilar.

Mazkur nufuzli sessiyada xalqaro kommunikatsiyalar, media, tahlil va davlat boshqaruvi sohasining quyidagi yetakchi mutaxassislari ishtirok etdilar:

• Assiya Beleukhanova — “PwC Eurasia” kompaniyasining marketing va kommunikatsiyalar bo‘limi boshlig‘i (Moderator)
• Abdulla Abdukadirov — O‘zbekiston Respublikasi Prezidenti huzuridagi Strategik islohotlar agentligi direktori vazifasini bajaruvchi
• Vladimir Norov — Markaziy Osiyo Sun’iy intellekt assotsiatsiyasi (AICA) raisi
• Jeffery McMillan — “PwC” kompaniyasining Markaziy va Sharqiy Yevropa bo‘yicha brend, marketing va kommunikatsiyalar bosh direktori
• Oybek Shaikhov — “EUROUZ” va “East-West Group” asoschisi
• Nargiza Alikulova — Osiyo taraqqiyot bankining (OTB) aloqa bo‘yicha mutaxassisi
• Pavel Nosachev — “Kursiv Media” direktori o‘rinbosari
• Leandro Slovinski — “The Investor” nashri bosh muharriri

Sessiya doirasida so‘zga chiqqan tajribali diplomat, Markaziy Osiyo Sun’iy intellekt assotsiatsiyasi (AICA) raisi Vladimir Norov O‘zbekiston tashqi siyosatidagi ochiqlik va raqamli diplomatiyaning ahamiyatiga alohida urg'u berib o'tdi:
“Prezident Shavkat Mirziyoyev boshchiligida davlat institutlarining ochiqligi ta’minlangani mintaqaviy hamkorlikni yangi bosqichga olib chiqdi. Bu siyosat Markaziy Osiyodagi uzoq yillik chegara va suv muammolarini hal etishda hamda o‘zaro ishonchni tiklashda muhim burilish yasadi”.
V. Norov raqamli diplomatiyaning imkoniyatlari bilan bir qatorda, axborot xavfsizligi va kiberjinoyatchilik kabi zamonaviy tahdidlar davlatlararo ishonchga putur yetkazayotganini ham aytdi. Shuningdek, u o‘z nutqida bugungi kunda sun'iy intellekt texnologiyalarini iqtisodiyot va ta’lim tizimiga integratsiya qilish muhim strategik vazifa ekanini ham ta’kidladi.

“PwC” kompaniyasining Markaziy va Sharqiy Yevropa bo‘yicha brend, marketing va kommunikatsiyalar bosh direktori Jefferi MakMillan davlatlarning xalqaro obro‘-e’tibori faqatgina chiroyli reklama kampaniyalari bilan o‘zgarmasligini ta’kidladi. Uning fikricha, hozirgi sun’iy intellekt va doimiy raqamli aloqa davrida mamlakatlar nafaqat investisiya, balki investorlarning diqqat-e’tibori uchun ham kurashmoqda. Bu vaziyatda muvaffaqiyat kaliti — targ‘ib qilinayotgan g‘oyalarning barcha platformalarda bir xil va izchil bo‘lishi hamda real islohotlar bilan asoslanishidir.

«Eng kuchli milliy narrativlar (davlat imiji) ham shunchaki mamlakat haqida emas, balki investorlar ushbu mamlakat bilan hamkorlikda erishishi mumkin bo‘lgan imkoniyatlar, salohiyat va kelajak haqida bo‘lishi lozim», deya qayd etib o‘tdi u.

“EUROUZ” va “East-West Group” asoschisi Oybek Shayxov Yevropa kompaniyalari yangi bozorlarga investisiya kiritishda boshqa mintaqalarga qaraganda ehtiyotkorroq ekanligini va ular uchun eng muhim omil «ishonch» ekanini ta’kidladi. Uning so‘zlariga ko‘ra, O‘zbekiston islohotlarning shaxsiy munosabatlarga emas, balki tizimli va institutlar darajasida mustahkamlanishi bosqichiga o‘tmoqda. Shayxov ijtimoiy tarmoqlardagi faol va ochiq muloqot faqatgina real natijalar va va’dalarning bajarilishi (ijrosi) bilan birgalikda ish bergandagina investorlarda uzoq muddatli ishonchni shakllantirishini qayd etdi.
«Yevropalik investorlar boshqalardan farqli o‘laroq, shunchaki tezkor foyda olishga emas, balki mamlakat bilan uzoq muddatli majburiyatlar va sheriklik o‘rnatishga e’tibor qaratadilar. Buning uchun esa ishonch va izchillik kerak. Islohotlarning ortga qaytmasligi haqida gapirish bir narsa, lekin ularning rahbar kim bo‘lishidan qat’i nazar ishlaydigan institutlar darajasiga chiqqanini ko‘rish butunlay boshqa narsadir. Bizda "aravani sekin qo‘shib, tez haydash" haqida maqol bor – yevropaliklar bozorga uzoqroq vaqt davomida kirishadi, ammo bir marta ishonch paydo bo‘lsa, ular bu yerda juda uzoq muddatga qolishadi», dedi u.

Osiyo taraqqiyot banki vakili Nargiza Alikulova innovatsion yutuqlarini namoyish etish, investorlarni jalb qilishda axborot vositalaridan qanday samarali foydalanayotganiga misol sifatida Samarqandda o‘tgan OTB yillik anjumanini namuna qilib, O‘zbekistonni xalqaro maydonda ochiq va xavfsiz hamkor sifatida namoyish etganini qayd etdi. Uning ta’kidlashicha, tadbirning muvaffaqiyati davlat idoralari va xalqaro tashkilotlarning yagona jamoa bo‘lib, tezkor ishlashi hamda nufuzli xorijiy OAVni keng jalb qila olganligi bilan bog‘liq. Shu bilan birga, u hukumat vakillari faqat tadbirga asoslangan quruq PR-formatlardan voz kechib, xalqaro matbuot bilan jonli va ochiq muloqotga doim tayyor turishlari zarurligini bildirdi.

«Mamlakatingizga shunchalik ko‘p xorijiy OAV vakillarini olib kelganingizda, ular shunchaki oldindan chiroyli tayyorlab qo‘yilgan press-relizlarni ko‘chirib ketishini kuta olmaysiz. Jurnalistlar jarayonga kirishishni va jonli muloqotni xohlashadi. Biz shunchaki "tadbirga asoslangan PR"dan voz kechishimiz va yuqori martabali hukumat mulozimlarining media bilan to‘g‘ridan-to‘g‘ri aloqaga kirishishini ta’minlashimiz shart, chunki xalqaro matbuot aynan shuni talab qiladi».

Ekspertlar tomonidan alohida ta’kidlanganidek, to‘g‘ri yo‘lga qo‘yilgan raqamli diplomatiya va “yumshoq kuch” (soft power) nafaqat xalqaro munosabatlarni mustahkamlash vositasi, balki to‘g‘ridan-to‘g‘ri xorijiy sarmoyalar oqimini ko‘paytirish, xalqaro maydonda ijobiy brendni yaratish va global muloqotda ishonchli pozitsiyani egallashning eng muhim iqtisodiy drayveriga aylanib ulgurgan. Ushbu platforma mamlakatning axborot va sarmoyaviy makondagi strategiyasini xalqaro andozalar asosida yanada takomillashtirish uchun muhim takliflarni ishlab chiqishga xizmat qildi.