O‘zbekiston Respublikasi Investitsiyalar, sanoat va savdo vazirligi

Poytaxtimizda Investitsiyalar, savdo va sanoat vazirligi muvofiqlashtiruvida o‘tkazilayotgan Toshkent xalqaro investitsiya forumining beshinchi - yubiley mavsumi doirasida “Sog‘liqni saqlash tizimlarini mustahkamlash hamda farmatsevtika va tibbiy texnologiyalar sohasida innovatsiyalarni rivojlantirish” mavzusida maxsus sessiya bo‘lib o‘tdi. Ushbu nufuzli tadbirda O‘zbekistonni mintaqaning yirik farmatsevtika va tibbiyot texnologiyalari markaziga aylantirish, sohaga xorijiy investitsiyalarni jalb etish hamda innovatsion yechimlarni amaliyotga joriy qilish masalalari keng muhokama qilindi.

Sessiya davomida mamlakatimiz iqtisodiyotidagi barqaror o‘sish va farmatsevtika tarmog‘idagi ulkan salohiyat muhokama markazida bo‘ldi. Farmatsevtika tarmog‘ini rivojlantirish agentligi direktori Abdulla Azizov O‘zbekiston iqtisodiyoti so‘nggi to‘qqiz yil ichida 6 foizdan yuqori barqaror o‘sishni qayd etganini, joriy yilning birinchi choragida esa bu ko‘rsatkich 8,4 foizni tashkil etganini alohida ta’kidladi. Uning so‘zlariga ko‘ra, 2030-yilga borib mamlakat aholisi 40 million kishidan oshishi kutilmoqda, bu esa sifatli tibbiyot xizmatlari va dori vositalariga bo‘lgan ehtiyojni keskin oshiradi.

Mintaqadagi vaziyatni tahlil qilar ekan, Azizov:

- 120 million aholiga ega bo‘lgan Markaziy Osiyo bozori 11 milliard AQSh dollarilik hajmga ega, biroq hozirda mahsulotlarning 92 foizi import qilinmoqda. Bizda “Bio Pharma City” deb nomlangan klaster mavjud bo‘lib, bu yerda investorlarga yer maydonlari deyarli bepul beriladi, barcha zarur infratuzilmani yaratish esa hukumat tomonidan ta’minlanadi. Agar sarmoyador 10 million dollardan ortiq sarmoya kiritsa, u foyda solig‘i, suv, yer va mol-mulk soliqlaridan to‘liq ozod qilinadi, - deya sohaga sarmoya kiritishning istiqbollari haqida so‘z yuritdi.

Xorijiy kompaniyalar vakillari ham mahalliy bozorda amalga oshirilishi rejalashtirilayotgan innovatsion loyihalari bilan o‘rtoqlashdilar. Xususan, Belgiyaning “Allegro NV” biotexnologiya kompaniyasi bosh direktori Lukas De Kuyper butun dunyo bo‘ylab qariyb bir milliard kishi aziyat chekayotgan osteoartrit kasalligini davolashga qaratilgan mutlaqo yangi yondashuvni taqdim etdi. Uning ma’lum qilishicha, kompaniya o‘ziga xos biopolimer saqlovchi steril inyeksiya shpritsini ishlab chiqqan bo‘lib, u bo‘g‘im biomexanikasini ijobiy tomonga o‘zgartiradi va uning samaradorligi bozordagi boshqa har qanday vositalardan uch baravar yuqori hisoblanadi.

- Bizning asosiy maqsadimiz bemorlarda tizza protezlash amaliyotiga bo‘lgan ehtiyojni 5 yildan 15 yilgacha kechiktirishdir. Kelgusida O‘zbekistonda millionlab shpritslarni ishlab chiqarishga qodir bo‘lgan zamonaviy tadqiqot va ishlab chiqarish zavodini barpo etishni rejalashtiryapmiz, - deya o‘z rejalari bilan o‘rtoqlashdi De Kuyper.

Shu bilan bir qatorda, tadbirda mahalliy xomashyoni qayta ishlash va eksport salohiyatini oshirish masalalari ham ishtirokchilar e’tiboridan chetda qolmadi. “So‘x Shafran Export” rahbari Rashod Odilboyev Farg‘ona viloyatining So‘x tumanida amalga oshirilayotgan yirik agrosanoat loyihasi haqida ma’lumot berdi. Tadbirkorning ta’kidlashicha, inson organizmi uchun o‘ta foydali bo‘lgan za’faron yetishtirish maydonlari bugungi kunda 5 gektardan 60 gektargacha kengaytirilmoqda. U ushbu jarayonga Janubiy Koreya texnologiyalari joriy etilayotganini, asosiy maqsad yuqori sifatli za’faronni qayta ishlash hamda jahon bozorlariga eksport qilish ekanligini bildirib o‘tdi.

Xulosa o‘rnida shuni aytish mumkinki, mamlakatimiz farmatsevtika va tibbiy texnologiyalar sohasiga jalb etilayotgan xalqaro kapital hamda innovatsiyalar nafaqat milliy sog‘liqni saqlash tizimini mustahkamlaydi, balki hududlarning ijtimoiy-iqtisodiy farovonligiga ham bevosita xizmat qiladi. TXIF doirasidagi ushbu muloqotlar davlat tomonidan taqdim etilayotgan mislsiz imtiyozlar va xorijiy texnologiyalar uyg‘unligida O‘zbekiston global tibbiyot sanoatining yangi markazlaridan biriga aylanib borayotganini ko‘rsatdi.