O‘zbekiston Respublikasi Investitsiyalar, sanoat va savdo vazirligi

V Toshkent xalqaro investitsiya forumi doirasida o‘tkazilgan “O‘zbekistonning barqaror va inklyuziv o‘sishi uchun Buyuk Britaniya kapitalini safarbar etish” mavzusidagi panel sessiyada ikki mamlakat o‘rtasidagi investitsiyaviy hamkorlikni kengaytirish, xalqaro kapitalni jalb qilish va uzoq muddatli moliyalashtirish imkoniyatlari muhokama qilindi.

Tadbirning eng muhim yangiliklaridan biri Buyuk Britaniya – Markaziy Osiyo Yashil va inklyuziv o‘sish jamg‘armasi (GIG Fund) ishga tushirilgani bo‘ldi. Jamg‘arma mintaqada barqaror iqtisodiy o‘sishni rag‘batlantirish va xususiy sektor rivojini qo‘llab-quvvatlashga qaratilgan.

Sessiyada Buyuk Britaniya hukumati, moliya institutlari va kapital bozorlari vakillari ishtirok etdi. Jumladan:

• Janobi Oliylari Timoti Smart - Buyuk Britaniyaning O‘zbekiston Respublikasidagi Favqulodda va Muxtor Elchisi (moderator)

• Lord Jeyson Stokvud - Buyuk Britaniyaning investitsiyalar bo‘yicha vaziri

• Julia Xoggett - London fond birjasi bosh direktori

• Saif Malik - Standard Chartered Bank bosh direktori

• Tim Rid - Buyuk Britaniya Eksport-moliya agentligi (UK Export Finance, UKEF) bosh direktori

Xalqaro kapitalni jalb qilish, yirik infratuzilma va sanoat loyihalarini moliyalashtirish, shuningdek, O‘zbekistonning jahon moliya bozorlari bilan aloqalarini kengaytirish masalalari muloqot markazida bo‘ldi.

Buyuk Britaniyaning investitsiyalar bo‘yicha vaziri Lord Jeyson Stokvud O‘zbekiston iqtisodiy islohotlar amaliy natija bera boshlagan muhim bosqichga kirganini ta’kidladi:

“O‘zbekiston bugun iqtisodiy rivojlanishning yangi bosqichiga kirib bormoqda. Buni raqamlarning o‘zi ham tasdiqlaydi. Buyuk Britaniyaning O‘zbekistonga eksporti 2016 yildagi 66 million funtdan o‘tgan yili qariyb 600 million funtga yetdi. Konchilik, ta’lim, yuridik xizmatlar, dizayn, arxitektura va moliyaviy xizmatlar kabi sohalardagi o‘zgarishlar yangi hamkorlik imkoniyatlarini ochmoqda. Eng muhimi, men bu yerda katta sur’at, kuchli energiya va kelajakka ishonchni ko‘ryapman”.

Stokvudning qayd etishicha, Britaniya kompaniyalari Yangi Toshkent loyihasi, Alisher Navoiy ilmiy-tadqiqot markazi va konchilik sohasidagi qator yirik tashabbuslarda faol ishtirok etmoqda. U, shuningdek, O‘zbekistonning investitsiyaviy salohiyatini xalqaro investorlar va kapital bozorlari oldida faolroq namoyish etish muhimligini ta’kidladi.

Paneldagi asosiy mavzulardan yana biri uzoq muddatli moliyalashtirish imkoniyatlari bo‘ldi. UK Export Finance bosh direktori Tim Rid tashkilot O‘zbekistondagi loyihalarni qo‘llab-quvvatlash uchun 4 milliard funtgacha moliyalashtirish imkoniyati mavjudligini ma’lum qildi:

“O‘zbekistondagi istiqbolli loyihalarni qo‘llab-quvvatlash uchun 4 milliard funtgacha moliyaviy imkoniyatimiz bor. Bu mamlakatni biz hamkorlikni kengaytirishga alohida e’tibor qaratayotgan eng muhim yo‘nalishlardan biriga aylantiradi. Yashil energetika, infratuzilma, transport, zamonaviy sanoat, muhim foydali qazilmalar va sog‘liqni saqlash sohalarida katta salohiyatni ko‘ryapmiz. Buyuk Britaniya O‘zbekiston bilan uzoq muddatli va ishonchli hamkorlikni davom ettirish niyatida”.

London fond birjasi bosh direktori Julia Xoggett esa UzNIF’ning London fond birjasida muvaffaqiyatli joylashtirilishini O‘zbekistonning xalqaro kapital bozorlariga chiqishidagi yangi qadam deb baholadi:

“UzNIF ikkita muhim missiyani bajardi. Bir tomondan, fond tashkil etilib, uning tarkibidagi kompaniyalarni xalqaro investorlar e’tiboriga olib chiqish va ularni global standartlarga tayyorlash imkonini berdi. Ikkinchi tomondan esa yangi kapitalni jalb qildi. Fondga bo‘lgan yuqori qiziqish va uning keyingi natijalari London investorlarining O‘zbekiston kabi yangi bozorlarga sarmoya kiritishga tayyor ekanini ko‘rsatdi”.

Xoggett UzNIF’ni O‘zbekistonning xalqaro investorlar bilan muloqotini yangi bosqichga olib chiqqan loyiha deb atadi. Uning fikricha, bu tajriba kelgusida davlat va xususiy kompaniyalarning xalqaro fond bozorlariga chiqishiga xizmat qiladi hamda mamlakatning global investorlar bilan aloqalarini yanada mustahkamlaydi.

Muhokamalar Buyuk Britaniya biznes va moliya doiralarining O‘zbekistonga bo‘lgan qiziqishi tobora ortib borayotganini ko‘rsatdi. Eksport moliyalashtirish vositalari, xalqaro kapital bozorlari va xususiy investitsiyalar esa mamlakatdagi yirik infratuzilma, sanoat hamda energetika loyihalarini amalga oshirishda muhim o‘rin tutishi qayd etildi.