O‘zbekiston Respublikasi Investitsiyalar, sanoat va savdo vazirligi

V yubiley Toshkent xalqaro investitsiya forumining yakuniy kuni ham xalqaro ekspertlar, investorlar va biznes vakillari ishtirokidagi muhim panel sessiyalari bilan davom etmoqda. Xususan, “Tranzaksiyalardan ekotizimlarga: O‘zbekiston fintex sohasining burilish nuqtasi (Uzum)” mavzusidagi erkin suhbatda mamlakatda raqamli moliyaviy xizmatlar bozori rivojlanishining asosiy tendensiyalari, fintex ekotizimlarining shakllanishi hamda sohaning kelgusi istiqbollari muhokama qilindi.

Unda Uzum kompaniyasining katta maslahatchisi Jon Hayman hamda Uzum hammuassisi, strategiya va biznesni rivojlantirish bo‘yicha direktori Nikolay Seleznev ishtirok etdi. Suhbat davomida kompaniyaning ekotizim yaratish tajribasi, fintex va elektron tijorat xizmatlarining integratsiyasi, shuningdek, O‘zbekistonda raqamli iqtisodiyotning jadal rivojlanishi uchun mavjud imkoniyatlar yuzasidan fikr almashildi.

Jon Hayman moderator sifatida qatnashdi va O‘zbekistonda fintex kompaniyalari o‘rtasida sog‘lom muhit borligini, hukumatning raqamli innovatsiyalarni qo‘llab-quvvatlash siyosati va Prezident Shavkat Mirziyoyev rahbarligida amalga oshirilayotgan islohotlar xalqaro investorlar tomonidan yuqori baholanayotganini qayd etdi.

Nikolay Seleznev esa so‘nggi yillarda xalqaro investorlar O‘zbekiston iqtisodiyotining salohiyati va imkoniyatlarini tobora ko‘proq anglay boshlaganini ta’kidladi. Uning qayd etishicha, rivojlangan bozorlarda o‘sish asosan optimallashtirish hisobiga ta’minlanayotgan bo‘lsa, O‘zbekiston uchun yangi talab, yangi iqtisodiy faoliyat turlari va yangi imkoniyatlarni yaratish orqali o‘sish salohiyati mavjud.

Shuningdek, u fintex sektori asta-sekin boshqa tarmoqlar singari odatiy xizmatlar segmentiga aylanib borayotganini aytdi. Shu nuqtai nazardan, kompaniya mijozlar uchun moliyaviy xizmatlardan foydalanishni yanada qulaylashtirish maqsadida infratuzilmaga, jumladan, bankomatlar tarmog‘ini rivojlantirishga sezilarli investitsiyalar kiritayotganini bildirdi.

Nikolay Seleznevning ta’kidlashicha, kompaniya Lotin Amerikasi, Sharqiy Osiyo va Qozog‘iston kabi bozorlardagi muvaffaqiyatli tajribalarni sinchiklab o‘rganadi. Biroq bugungi kunda biror biznes modelini to‘liq nusxalash orqali muvaffaqiyatga erishish davri ortda qolgan. Shu sababli har bir mahsulot va xizmat mahalliy bozor xususiyatlari, iste’molchilar ehtiyojlari va iqtisodiy sharoitlardan kelib chiqib moslashtirilishi lozim.

Ekspertlar Uzum ekotizimining asosiy ustunliklaridan biri uning mahalliy bozorni chuqur tushunishi va mamlakat infratuzilmasiga uzoq muddatli investitsiyalar kiritayotganida ekanini ta’kidladi. Qayd etilishicha, Uzum bugungi kunda millionlab foydalanuvchilar uchun onlayn xaridlar bilan bog‘liq eng taniqli brendga biriga aylanib bormoqda.

“O‘zbekistonda kreditlash darajasi ko‘plab xalqaro bozorlarga nisbatan hanuz past bo‘lib, bu sohada sezilarli o‘sish salohiyati mavjud. Shu bois kompaniya sun’iy intellekt va katta hajmdagi ma’lumotlar tahliliga tayangan holda mijozlarning xulq-atvori va moliyaviy ko‘rsatkichlarini o‘rganib, qarz oluvchilarning to‘lov qobiliyatini aniq baholash tizimlarini rivojlantirmoqda”, - deydi Nikolay Seleznev.

Nikolay Seleznev sun’iy intellekt Uzum ekotizimining muhim tarkibiy qismiga aylanganini ham ta’kidladi. Uning aytishicha, kompaniya mahsulotlarni ishlab chiqishdan tortib texnologik jarayonlargacha bo‘lgan barcha yo‘nalishlarda sun’iy intellekt yechimlaridan faol foydalanmoqda.

Uzum ekotizimida sun’iy intellekt chakana bozordagi narxlarni monitoring qilish, kredit skoringini takomillashtirish hamda mijozlarni qo‘llab-quvvatlash xizmatlari samaradorligini oshirishda muhim rol o‘ynayotgani aytildi.

Shuningdek, Uzum foydalanuvchilar bazasini yil oxirigacha yana 5 million mijoz hisobiga kengaytirish imkoniyatiga ega ekani qayd etildi. Suhbatda aytilishicha, Uzum oldida foydalanuvchilar soni va moliyaviy xizmatlar ko‘lami bo‘yicha 5–10 barobar o‘sish imkoniyati mavjud bo‘lib, kompaniya O‘zbekiston bozorining uzoq muddatli istiqbollariga yuqori baho bermoqda.