O‘zbekiston Respublikasi Investitsiyalar, sanoat va savdo vazirligi

Toshkent xalqaro investitsiya forumi doirasida “Kinstellar” xalqaro yuridik firmasi hamkorligida tashkil etilgan “Markaziy Osiyoda temir yo‘l sektorini o‘zgartirish va yangi logistika yo‘laklarini rivojlantirish: investitsiya imkoniyatlari va mintaqaviy aloqalar” mavzusiga bag‘ishlangan yirik panel sessiyasi bo‘lib o‘tdi.

Mazkur strategik sessiyada transport sohasining yetakchi mutaxassislari, xalqaro ekspertlar hamda davlat mutasaddilari ishtirok etdilar:

• Dilshad Khabibullayev - “Kinstellar” xalqaro yuridik firmasi hamkori (Moderator)
• Jasurbek Choriyev - O‘zbekiston Respublikasi Transport vaziri o‘rinbosari
• Aleksey Skatin - Yevrosiyo taraqqiyot bankining (YeTB) katta boshqaruvchi direktori
• Innokentiy Ivanov - “Freshfields” xalqaro yuridik firmasi hamkori
• Mansur Bustoni - Jahon bankining transport bo‘yicha bosh mutaxassisi
  Roman Sorkin - Markaziy Osiyo va Janubiy Kavkaz bo‘yicha savdo masalalari vitse-prezidenti

Sessiya ishtirokchilari temir yo‘l infratuzilmasini modernizatsiya qilish, xalqaro transport yo‘laklarini rivojlantirish, investitsiyalarni jalb etish hamda Markaziy Osiyoning logistika salohiyatini kengaytirish masalalariga alohida e’tibor qaratdilar. Ta’kidlanishicha, mintaqaning transport tizimi keng ko‘lamli transformatsiya jarayonini boshdan kechirmoqda va iqtisodiy o‘sish hamda mintaqaviy integratsiyaning muhim omillaridan biriga aylanmoqda.

O‘zbekiston Respublikasi transport vaziri o‘rinbosari va TRACECA bosh kotibi Jasurbek Choriyevning ta’kidlashicha, mamlakat transport sektori barqaror o‘sish sur’atlarini namoyish etmoqda va mintaqa iqtisodiy taraqqiyotining asosiy drayverlaridan biriga aylanmoqda. Uning so‘zlariga ko‘ra, yuz berayotgan o‘zgarishlar alohida tarmoq ko‘rsatkichlaridan tashqariga chiqib, Markaziy Osiyoning butun transport-logistika tizimidagi chuqur transformatsiyani aks ettirmoqda.

“Bugungi kunda O‘zbekiston aviatsiya sohasida dunyodagi eng yuqori o‘sish sur’atlaridan birini namoyish etmoqda. Bu rivojlanish ACI, ICAO va Jahon banki kabi xalqaro tashkilotlar ma’lumotlari bilan ham tasdiqlanadi. 2030-yilgacha mo‘ljallangan strategiyamiz aviaparkni 180 ta havo kemasigacha yetkazishni nazarda tutadi va bu ko‘rsatkichga belgilangan muddatdan oldinroq erishishimiz mumkin”, – dedi u.

Shuningdek, Choriyev infratuzilmani rivojlantirish bo‘yicha yirik ko‘rsatkichlarga ham to‘xtalib, yiliga 15 million nafargacha turistlar oqimini qabul qilish, aviaparkni 100 tadan ortiq havo kemalarigacha kengaytirish hamda uni yanada rivojlantirish bo‘yicha ulkan rejalar mavjudligini qayd etdi. U temir yo‘l tizimi mamlakat ichki va tashqi yuk aylanmasining qariyb 90 foizini ta’minlayotganini alohida ta’kidladi. Shuningdek, amalga oshirilayotgan va istiqboldagi loyihalar doirasida 2030-yilga qadar temir yo‘l tarmoqlarining 70 foizini elektrlashtirish hamda xalqaro transport yo‘laklarini rivojlantirish orqali yuk tashish hajmini 20 million tonnagacha yetkazish rejalari ma’lum qilindi.

Sessiya davomida O‘zbekiston temir yo‘l sohasini isloh qilish, xususiy kapital ishtirokini kengaytirish va infratuzilma loyihalarining investitsiyaviy jozibadorligini oshirish masalalari ham batafsil muhokama qilindi. Jumladan, shahar atrofi temir yo‘l qatnovlarini rivojlantirish va transport yo‘laklarini yirik shaharlardagi aglomeratsiyalar bilan integratsiya qilish yo‘nalishlariga alohida e’tibor qaratildi.

Jahon bankining transport bo‘yicha bosh mutaxassisi Mansur Bustonining qayd etishicha, asosiy vazifa O‘zbekiston temir yo‘l sektorini xalqaro moliyaviy institutlar va xususiy investorlarni samarali jalb qila oladigan tijoriy jihatdan barqaror modelga aylantirishdan iborat.

“Bizning yondashuvimiz davlat temir yo‘l tizimini tijoriy jihatdan hayotiy va banklar uchun jozibador korxonaga aylantirishga qaratilgan. Bunda xalqaro moliyaviy institutlar va xususiy investorlar davlat bilan hamkorlikda faoliyat yurita oladi.

O‘zbekiston uchun temir yo‘l tanlov emas, balki mamlakat iqtisodiy barqarorligini ta’minlovchi strategik infratuzilmadir. Biz allaqachon tarkibiy transformatsiya, moliyaviy barqarorlik va investitsiyalarni jalb etishga tayyorgarlik yo‘nalishlarida sezilarli yutuqlarni kuzatmoqdamiz”, - dedi u.

Sessiyada shahar atrofi temir yo‘l qatnovlarini rivojlantirish masalasi ham muhokama qilindi. Xususan, Toshkent–Chirchiq pilot yo‘nalishi Jahon banki bahosiga ko‘ra, zamonaviy shahar transport integratsiyasi va infratuzilmani moliyalashtirishning barqaror modeli bo‘yicha ilk muvaffaqiyatli loyihalardan biriga aylanishi mumkin.

Sessiya yakunida ishtirokchilar zamonaviy transport infratuzilmasini rivojlantirish, xalqaro logistika yo‘laklarini tashkil etish va tarmoqdagi islohotlarni izchil davom ettirish investitsiyalarni jalb qilish, mintaqaviy hamkorlikni kengaytirish hamda Markaziy Osiyoning Yevrosiyoning muhim transport-logistika markazlaridan biri sifatidagi mavqeini mustahkamlash uchun yangi imkoniyatlar yaratishini ta’kidladilar.