O‘zbekiston Respublikasi Investitsiyalar, sanoat va savdo vazirligi

Poytaxtda o‘tkazilayotgan V yubiley Toshkent xalqaro investitsiya forumi doirasida O‘zbek-Nemis siyosiy va iqtisodiy muloqoti bo‘lib o‘tdi. Tadbir ikki davlat o‘rtasidagi strategik iqtisodiy sheriklikni yanada mustahkamlash, o‘zaro investitsiyalar hajmini kengaytirish, konchilik hamda muhim minerallar, mashinasozlik, kimyo va farmatsevtika sanoatida qo‘shma loyihalarni ilgari surish masalalariga bag‘ishlandi.

Muloqotda Siemens Energy, Linde, Henkel, Knauf, Papenburg, Volkswagen, Deutsche Kabel, CLAAS, KfW IPEX-Bank, Deutsche Bank, ODDO BHF hamda Landesbank kabi Germaniyaning yetakchi sanoat, energetika, moliya va texnologiya kompaniyalari vakillari ishtirok etdi.

Tadbirda Germaniya iqtisodiyotining Markaziy Osiyodagi vakolatxonasi rahbari Eduard Kinsbrunner moderatorlik qildi va hozirgi siyosiy vaziyatda ikkala davlat o‘rtasidagi aloqalarni rivojlantirish muhim ekanini qayd etdi.

O‘zbekiston Respublikasi Investitsiyalar, sanoat va savdo vaziri Laziz Kudratov so‘zga chiqib, O‘zbekiston va Germaniya o‘rtasidagi siyosiy hamda iqtisodiy munosabatlar yuqori darajada rivojlanib borayotganini ta’kidladi. Uning qayd etishicha, tomonlar mavjud hamkorlikni yanada mustahkamlash va yangi yo‘nalishlar bo‘yicha sheriklikni kengaytirish ustida faol ish olib bormoqda.

“O‘zaro savdo hajmini 1 milliard dollarlik marraga yetkazishga muvaffaq bo‘ldik. Biroq birgalikdagi sa’y-harakatlar orqali bundan-da yuqori natijalarga erishishimiz mumkinligiga ishonamiz. Bugungi kunda O‘zbekistonda 230 dan ortiq Germaniya kompaniyasi faoliyat yuritmoqda va investitsiya kiritmoqda. Biz ularga mamlakatimiz iqtisodiyotini rivojlantirishga qo‘shayotgan hissasi uchun minnatdorlik bildiramiz”, — dedi Laziz Kudratov.

Investitsiyalar, sanoat va savdo vaziri o‘z nutqida O‘zbekistonda inson kapitalini rivojlantirish, xususan, IT sohasida malakali kadrlar tayyorlash ustuvor yo‘nalishlardan biri ekanini ta’kidladi. Uning qayd etishicha, bugungi kunda mamlakatda bir million dasturchini tayyorlashga qaratilgan keng ko‘lamli tashabbus amalga oshirilmoqda. Shuningdek, IT Park ekotizimining izchil rivojlanayotgani va samarali faoliyat yuritayotgani O‘zbekistonning raqamli iqtisodiyotni rivojlantirish borasidagi salohiyatini yaqqol namoyon etmoqda.

Laziz Kudratov Germaniya kompaniyalarini O‘zbekistondagi IT hamjamiyati va yosh mutaxassislar bilan faol hamkorlik qilishga chaqirib, ushbu yo‘nalishda Investitsiyalar, sanoat va savdo vazirligi har tomonlama ko‘mak ko‘rsatishga tayyor ekanini bildirdi. U O‘zbekistonning kelgusi iqtisodiy rivojlanishi va texnologik transformatsiyasida xalqaro hamkorlar, jumladan Germaniya biznesi va institutlarining hissasi muhim ahamiyat kasb etishini alohida ta’kidladi.

Shundan so‘ng Germaniya Federal iqtisodiyot va energetika vazirligining davlat kotibi Stefan Rouenhoff so‘zga chiqdi. U Toshkent xalqaro investitsiya forumida ilk bor ishtirok etayotganini qayd etib, forumning yuqori darajadagi tashkil etilgani unda katta taassurot qoldirganini ta’kidladi.

Rouenhoffning aytishicha, O‘zbekiston hukumati tomonidan yangi texnologiyalar va ilg‘or bilimlarni (know-how) jalb etish hamda iqtisodiyotni modernizatsiya qilish yo‘lida amalga oshirilayotgan sa’y-harakatlarni yuqori baholadi. Uning ta’kidlashicha, O‘zbekistonning iqtisodiy transformatsiya yo‘li e’tirofga loyiq bo‘lib, mamlakat bugungi kunda xalqaro biznes uchun yangi bozor imkoniyatlarini yaratmoqda. Rouenhoff Germaniya va O‘zbekiston o‘rtasidagi uzoq muddatli hamkorlik uchun mustahkam asos shakllanayotganini qayd etib, mavjud imkoniyatlardan samarali foydalanish va qo‘shma loyihalarni jadallashtirish muhimligini ta’kidladi.

Muloqotning navbatdagi qismida “Sanoat, innovatsiyalar va malakali kadrlar: O‘zbek—Nemis hamkorligini yangi bosqichga olib chiqish uchun qanday imkoniyat va sharoitlar yaratish mumkin?” mavzusida panel sessiyasi bo‘lib o‘tdi.

Unda Eduard Kinsbrunner moderatorligida Kasbiy ta’lim agentligi direktor o‘rinbosari Shixnazar Sharofaddinov, Germaniya sanoatchilari federatsiyasi (BDI) Ijroiya kengashi a’zosi Volfgang Nidermark, “Olmaliq KMK” AJ o‘quv markazi rahbari Doniyor Karimov hamda HansaFlex Connect GmbH & Co. KG boshqaruvchi direktori Tomas Avsyuk ishtirok etdi.

Muloqotning so‘nggi qismida “Xomashyo va logistika: Markaziy Osiyo va Yevropa o‘rtasidagi transport-logistika aloqalarini mustahkamlash hamda ilg‘or loyihalarni rivojlantirish istiqbollari” mavzusida panel sessiyasi ham o‘tkazildi.

Muhokamalarda Germaniya Sharqiy biznes assotsiatsiyasining mintaqaviy direktori Vladimir Nikitenko, “O‘zmetkombinat” AJ Kuzatuv kengashi raisining global integratsiya bo‘yicha maxsus vakili Timur Xikmatullayev, DB Engineering & Consulting GmbH va DB E.C.O. Group bosh direktori Niko Warbanoff, Transport va logistika muammolarini o‘rganish markazi direktori Bekhzod Xolmatov hamda KfW IPEX-Bank GmbH bosh direktori Belgin Rudack ishtirok etib, Markaziy Osiyo va Yevropa o‘rtasidagi transport yo‘laklarini rivojlantirish, logistika infratuzilmasini modernizatsiya qilish hamda mintaqalararo iqtisodiy bog‘liqlikni kuchaytirish masalalari yuzasidan fikr almashdi.

O‘zbek—Nemis siyosiy va iqtisodiy muloqoti ikki mamlakat o‘rtasidagi strategik sheriklik izchil rivojlanib borayotganini yana bir bor tasdiqladi. Tadbir davomida investitsiyalar, sanoat kooperatsiyasi, inson kapitalini rivojlantirish, raqamli texnologiyalar, logistika va transport infratuzilmasi kabi ustuvor yo‘nalishlarda hamkorlikni chuqurlashtirish masalalari muhokama qilindi.

Ishtirokchilar O‘zbekistonning iqtisodiy islohotlari va investitsiyaviy jozibadorligini yuqori baholab, mavjud imkoniyatlardan samarali foydalanish orqali o‘zaro savdo va investitsiyalar hajmini yanada oshirish, qo‘shma loyihalar sonini ko‘paytirish hamda uzoq muddatli iqtisodiy hamkorlikni mustahkamlashga tayyor ekanliklarini bildirdi.