O‘zbekiston Respublikasi Investitsiyalar, sanoat va savdo vazirligi

Toshkent xalqaro investitsiya forumi doirasida milliy iqtisodiyotning eksport salohiyatini yuksaltirish va sanoat tarmoqlarini xalqaro standartlar asosida modernizatsiya qilishga qaratilgan “Ishlab chiqarishni kengaytirish: qo‘shimcha qiymatga ega ishlab chiqarish va eksport raqobatbardoshligi” mavzusida maxsus pitch sessiyasi bo‘lib o‘tdi.

Tadbir davomida kimyo sanoati, to‘qimachilik, qurilish materiallari ishlab chiqarish va elektrotexnika kabi iqtisodiyotning ustuvor segmentlariga doir eng istiqbolli va innovatsion loyihalarning maqsadli taqdimotlari (pitching) namoyish etildi. Mutaxassislar tomonidan ta’kidlanganidek, aynan ushbu tanlab olingan tarmoqlar xomashyoga yuqori qo‘shimcha qiymat yaratish hamda mamlakat iqtisodiyotini global qiymat zanjirlariga (global value chains) muvaffaqiyatli integratsiya qilish uchun eng kuchli salohiyatga ega yo‘nalishlar hisoblanadi.

Ispaniyaning nufuzli “Cosentino Global, S.L.U.” kompaniyasi vakili Fransisko Gonsales Dominges O‘zbekiston va xususan Toshkentni Markaziy Osiyo bozoriga chiqish uchun muhim nuqta sifatida baholadi. Uning ta’kidlashicha, mamlakat aholisining yoshligi, qurilish va dizayn sohalaridagi o‘sish sur’atlari kompaniyaning mintaqadagi rivojlanish rejalariga mos keladi.

“Men uchun Toshkent — biznesimizni butun Markaziy Osiyo bo‘ylab kengaytirish uchun darvoza vazifasini bajaradi. Shu sababli bu yerda barqaror materiallar bozorini rivojlantirish va mintaqaviy faoliyatimizni kengaytirishni rejalashtiryapmiz”, — dedi Fransisko Gonsales Dominges.

Kids Plate brendi asoschisi Dilnoza Toshmuhamedovaning ta’kidlashicha, O‘zbekiston va umuman Markaziy Osiyo aholisi sonining o‘sishi hamda tug‘ilish darajasining yuqoriligi bolalar ovqati bozorini istiqbolli yo‘nalishlardan biriga aylantirmoqda. Mintaqada bolalar ovqatiga talab muntazam oshib borayotgan bo‘lsa-da, ushbu mahsulotlar segmenti hanuz importga sezilarli darajada bog‘liq bo‘lib qolmoqda.

“Markaziy Osiyo 80 milliondan ortiq aholiga ega bo‘lgan yosh va o‘sib borayotgan mintaqadir. Birgina O‘zbekistonda 2023-yilda qariyb 880 ming bola tug‘ilgan. Bu esa xavfsiz, qulay va ishonchli bolalar ovqatiga bo‘lgan talab har yili qayta shakllanib borishini anglatadi. Shu bilan birga, ota-onalar xarid qilayotgan mahsulotlarning katta qismi import hisobiga ta’minlanmoqda. Bizning maqsadimiz ushbu toifani mahalliylashtirish, qo‘shimcha qiymatni mamlakat ichida yaratish va O‘zbekistonni bolalar ovqati ishlab chiqarish bo‘yicha mintaqaviy markazga aylantirishdir”, — dedi Dilnoza Toshmuhamedova.

Jizzax viloyatining Zomin tumanida joylashgan 400 gektarli «O‘zbekiston-Xitoy Mingyuan Ipak yo‘li» erkin savdo zonasida zamonaviy sanoat, logistika va biznes markazlari rivojlantirilmoqda. 2026 yilda 70 million AQSH dollari investitsiya evaziga kunlik 600 tonna quvvatga ega yangi oyna ishlab chiqarish liniyasi ishga tushirilganidan so‘ng, hududda navbatdagi yirik loyiha amalga oshirilmoqda. Temir yo‘l va to‘liq infratuzilmaga ega ushbu zona xorijiy investorlar uchun soliq va bojxona imtiyozlarini taklif qilmoqda.
Zomin Technopark direktori o‘rinbosari Abubakir Berdiyev hududning salohiyati va investorlar uchun yaratilgan imkoniyatlar haqida gapirar ekan:
«Maqsadimiz oddiy — sanoat, logistika va savdo uchun zamonaviy platforma yaratishdir. Tayyor infratuzilma va xususiy bojxona ombori investorlarning vaqti hamda xarajatlarini tejashga xizmat qiladi. Bugungi kunda O‘zbekiston Markaziy Osiyoda investisiya kiritish uchun eng xavfsiz va barqaror joylardan biridir. Asrlar davomida madaniyatlarni bog‘lagan Ipak yo‘li o‘rnida biz investitsiya va sanoat hamkorligining yangi zamonaviy tizimini barpo etmoqdamiz va barcha strategik investorlarni sheriklikka taklif qilamiz», deya ta’kidladi.

Mazkur amaliy muloqot va loyihalar taqdimoti maydoni xorijiy va mahalliy biznes yetakchilari, yirik ishlab chiqaruvchi kompaniyalar rahbarlari hamda investorlarni yagona maqsad yo‘lida birlashtirdi. Ishtirokchilar investitsion jozibadorlikni oshirish, xalqaro raqobatbardosh mahsulotlar ishlab chiqarishni yo‘lga qo‘yish hamda yangi eksport bozorlarini zabt etish istiqbollarini muhokama qildilar. Loyihalar namoyishi bevosita sarmoyadorlar bilan muzokaralar o‘tkazish va amaliy kelishuvlarga erishish uchun qulay zamin yaratdi.