O‘zbekiston Respublikasi Investitsiyalar, sanoat va savdo vazirligi

17-iyun kuni V Toshkent xalqaro investitsiya forumi doirasida O‘zbekiston–Ozarbayjon biznes-forumi bo‘lib o‘tdi. Unda davlat idoralari, iqtisodiy zonalar vakillari, rivojlanish institutlari hamda biznes doiralari rahbarlari sanoat hamkorligi, investitsiya imkoniyatlari va qo‘shma loyihalarni rivojlantirish masalalarini muhokama qildilar.

Tadbir davomida investitsiya muhitini yaxshilash, sanoat ishlab chiqarishini kengaytirish, logistika aloqalarini mustahkamlash hamda mintaqaviy iqtisodiy integratsiyani chuqurlashtirish masalalariga alohida e’tibor qaratildi. Muhokamalarning muhim qismi maxsus iqtisodiy zonalarni rivojlantirish, ularning investitsiyalarni jalb qilish, yangi ish o‘rinlari yaratish va eksportga yo‘naltirilgan ishlab chiqarishni qo‘llab-quvvatlashdagi o‘rniga bag‘ishlandi.

O‘zbekiston tomoni mamlakatning yetakchi sanoat platformalaridan biri bo‘lgan Jizzax maxsus iqtisodiy zonasi tajribasini taqdim etdi. 2013-yilda tashkil etilgan mazkur hududda bugungi kunda 50 dan ortiq investitsiya loyihalari amalga oshirilmoqda va 6 mingdan ziyod ish o‘rni yaratilgan. 2015–2025-yillar davomida zona rezidentlari tomonidan 45,9 trillion so‘mlik sanoat mahsulotlari ishlab chiqarilib, eksport hajmi 260 million AQSh dollariga yetgan.

Jizzax maxsus iqtisodiy zonasi direksiyasi direktori Ziyadin Sayidov zonani kengaytirish, yangi sanoat va muhandislik infratuzilmasini rivojlantirish, shuningdek, axborot texnologiyalari, sog‘liqni saqlash, ta’lim, turizm, logistika va xizmatlar sohalariga investitsiyalarni jalb etish rejalari haqida ma’lumot berdi. Shuningdek, u quyosh energetikasi loyihalari va energiya tejamkor texnologiyalarni joriy etishga qaratilgan “yashil” rivojlanish tashabbuslari muhimligini ta’kidladi.

Forumda O‘zbekistondagi ixtisoslashgan sanoat zonalari faoliyati ham namoyish etildi. Xususan, Parkent-Pharm erkin iqtisodiy zonasi farmatsevtika va biotexnologiyalar yo‘nalishidagi istiqbolli markaz sifatida taqdim etildi. Hozirda hududda umumiy qiymati 25 million dollar bo‘lgan 14 ta investitsiya loyihasi amalga oshirilmoqda. Ulardan 7 tasi ishga tushirilgan bo‘lib, 400 dan ortiq ish o‘rni yaratilgan. Loyihalar to‘liq quvvatga chiqqach, yiliga 400 milliard so‘mlik mahsulot ishlab chiqarish, mingga yaqin ish o‘rni yaratish va farmatsevtika mahsulotlari eksportini 40 million dollargacha yetkazish rejalashtirilgan.

Shuningdek, o‘zbekistonlik, ozarbayjonlik va xalqaro investorlar ishtirokidagi qator istiqbolli qo‘shma tashabbuslar ham muhokama qilindi. Jumladan, Jizzax shahrida zamonaviy ko‘rgazma markazini barpo etish hamda Aydarko‘l bo‘yida turizm majmuasini yaratish loyihalari ko‘rib chiqildi.

Logistika va transport infratuzilmasini rivojlantirish masalalari ham uchrashuvning asosiy mavzularidan biri bo‘ldi.

“Geografik joylashuv O‘zbekistonning muhim ustunligi hisoblanadi. Biroq asosiy vazifa ushbu ustunlikni iqtisodiy qiymatga aylantirishdir. Bunga zamonaviy multimodal logistika infratuzilmasini rivojlantirish orqali erishish mumkin”, — dedi Centrum Holding asoschisi va bosh ijrochi direktori Abdulaziz Abdurahmanov.

Ozarbayjon tomoni investitsiyalarni jalb qilish va sanoat ishlab chiqarishini kengaytirish vositasi sifatida sanoat parklari hamda erkin iqtisodiy zonalarni rivojlantirish borasidagi tajribasini taqdim etdi. Xususan, Boku porti yaqinida joylashgan Alat erkin iqtisodiy zonasi hamda mamlakatdagi sanoat parklari faoliyati haqida ma’lumot berildi. Qayd etilishicha, mazkur zonalarda bugungi kunda 154 ta korxona faoliyat yuritmoqda va ular orqali 20,8 mingdan ortiq ish o‘rni yaratilgan.

Forum O‘zbekiston va Ozarbayjon o‘rtasida sanoat, logistika, turizm va investitsiyalarni rag‘batlantirish sohalaridagi hamkorlik salohiyati tobora kengayib borayotganini yana bir bor namoyish etdi. Ta’kidlanganidek, iqtisodiy zonalar, biznes hamjamiyatlari va davlat institutlari o‘rtasidagi yaqin hamkorlik yangi investitsiya loyihalari, texnologiyalar transferi va ikki mamlakat o‘rtasidagi iqtisodiy aloqalarning yanada mustahkamlanishiga xizmat qiladi.