O‘zbekiston Respublikasi Investitsiyalar, sanoat va savdo vazirligi

Investitsiyalar, savdo va sanoat vazirligi muvofiqlashtirayotgan V Toshkent xalqaro investitsiya forumi doirasida O‘zbekiston va Turkiya o‘rtasidagi savdo-iqtisodiy va investitsiyaviy hamkorlikni yanada rivojlantirishga bag‘ishlangan maqsadida Turkiya - O‘zbekiston biznes forumi bo‘lib o‘tdi.

Forum O‘zbekiston Respublikasi Bosh vaziri o‘rinbosari - Iqtisodiyot va moliya vaziri Jamshid Qo‘chqorovning kirish so‘zi bilan ochildi. Jamshid Qo‘chqorov so‘zi davomida Samarqand shahar yaqinida joylashgan Imom Buxoriy ziyorat majmuasini rivojlantirish va boshqarish jarayonlarida ishtirok etish uchun Turkiya tomoni katta qiziqish bildirayotganini ma’lum qildi.

“Ijtimoiy sohada hamkorlikni yanada tizimli yo‘lga qo‘yish maqsadida Turkiya iqtisodiyotida xorijiy ishchi kuchiga ehtiyoj bo‘lgan yuqori tarmoqlardagi bo‘sh ish o‘rinlariga o‘zbekistonlik mutaxassislarni uyushgan tartibda ishga joylashtirish bo‘yicha amaliy mexanizmlarni ishlab chiqmoqdamiz”, - dedi Iqtisodiyot va moliya vaziri.

Bugungi kunda O‘zbekistonda 2 mingdan oshiq Turkiya kapitali ishtirokida korxonalar faoliyat yuritmoqda va bu borada Turkiya yetakchi o‘rinlardan birini egallaydi. Mamlakat qishloq xo‘jaligi sohasida katta tajribaga ega ekani alohida qayd etildi. Shu sababli Jamshid Qo‘chqorov Turkiya kompaniyalarini bu sohada O‘zbekiston bilan hamkorlik qilishga chorladi.

Shundan so‘ng Turkiya savdo vaziri Ömer Bolat so‘zga chiqib, biznes forumga taklif uchun minnatdorchilik bildirdi va forum doirasida amalga oshiriladigan kelishuvlar va o‘rnatiladigan yangi aloqalar ikkala mamlakat iqtisodiyoti uchun ham foydali bo‘lishini aytib o‘tdi.

Rejaga ko‘ra, Turkiya - O‘zbekiston biznes forumi panel sessiyasi bilan davom ettirildi va suhbatni moderator sifatida Özgür Onur Özgüven olib bordi.

“Çalık Enerji” kompaniyasi bosh direktori Termel Kotil so‘nggi yillarda O‘zbekistonning xalqaro reytingi yaxshilanib borayotganini qayd etib, bu jarayon iqtisodiyot rivojlanishi uchun katta xizmat qilishini ta’kidladi. “O‘zbekiston reytinglari oshirilishi mamlakatga investitsiya oqib kirishini anglatadi”, - dedi Turkiya vakili.

“Anadolu Group” kompaniyasining Oʻzbekiston boʻyicha maslahatchisi Ezel Ağaoğlu O‘zbekistonni kuchli ichki bozorga ega ekanini, mamlakat kelajakda sanoat markaziga aylanishini kutayotganini aytib o‘tdi. 

Turkiya kompaniyasi 2021-yilda Coca-Cola Uzbekistan kompaniyasining 57 foizini 252 mln dollarga sotib olgandi. Ağaoğluning aytishicha, keyinchalik Coca-Cola Uzbekistan’ning qolgan 43 foiz ulushi ham sotib olindi va hozirda “Anadolu Group” O‘zbekistondagi kompaniyaning 100 foiziga egalik qiladi.

Ezel Ağaoğlu “Anadolu Group” istiqbolda O‘zbekistonda ekotizim yaratishni reja qilayotgani haqida ma’lum qildi. Uning ta’kidlashicha, kompaniya o‘z faoliyatini yuqori darajada mahalliylashtirish, mahalliy ishlab chiqarish va ta’minot zanjirlarini rivojlantirish hamda mamlakat iqtisodiyotiga uzoq muddatli hissa qo‘shishni maqsad qilgan.

Bundan tashqari sessiyada “Ermak” kompaniyasi asoschisi va bosh direktori Valijon Salihov, Ziraat Bank Uzbekistan Boshqaruv raisi Volkan Güldürmez va Iqtisodiyot va moliya vazirligi departament boshlig‘i Abduqodir Yoqubov ham ishtirok etdi.

“Ermak” asoschisi O‘zbekistonda ham Turkiyadan kam bo‘lmagan sharoitlar mavjudligini aytib, turkiyalik biznes egalarini mamlakatga taklif qildi. Volkan Güldürmez esa Turkiya va O‘zbekiston o‘rtasida savdo aloqalarida bank tizimining ahamiyati haqida tadbir qatnashchilariga gapirib berdi.

Bundan tashqari, Ziraat Bank Uzbekistan raisi Turkiyadagi eng yirik davlat bankining O‘zbekistondagi faoliyatini kengaytirish, hududlarda yangi filiallar ochish bo‘yicha rejalar mavjudligini ma’lum qildi.

Forum yakunlari bo‘yicha sanoat, tashqi savdo va ishlab chiqarish kabi iqtisodiyotning muhim tarmoqlarida hamkorlikni rivojlantirishga qaratilgan qator kelishuvlarga erishildi hamda tegishli hujjatlar imzolandi.