O‘zbekiston Respublikasi Investitsiyalar, sanoat va savdo vazirligi

“Obro‘, ishonch va xavfsizlik: korruptsiyaga qarshi samarali siyosat va jinoiy iqtisodga qarshi kurashish orqali xorijiy investitsiyalar muhitini yaxshilash” panel sessiyasida korrupsiyaning jahon iqtisodiyoti rivojlanishi va investitsiyalarga ta’siri muhokama qilindi.
 

Tadbirni Krans Montana forumi asoschisi Karteron Jan-Pol Olivier olib bordi.

Ma’ruzachilar orasida Oliy Hazrati Lyuksemburg shahzodasi, shuningdek, iqtisod va huquq sohasi mutaxassislari ishtirok etishdi.

So‘zga chiqqanlar korrupsiya nafaqat alohida mamlakatlarning ichki muammosi, balki barqaror rivojlanish asoslari va iqtisodiy tizimlar samaradorligiga putur yetkazuvchi global tahdid ekanligini aytildi. Investitsion jozibadorlik kontekstida investitsiyalarning xatarlari va oʻsish salohiyatini baholashda siyosiy va iqtisodiy maydonning sof bo‘lishi hal qiluvchi rol oʻynashi ta’kidlandi.

“Korrupsiyaga qarshi samarali kurash kompleks yondashuvni, jumladan, qonunchilikni mustahkamlash va davlat organlari faoliyatining shaffofligini oshirishni talab qiladi”, – deydi O‘zbekiston Respublikasi Korrupsiyaga qarshi kurashish agentligi direktori Akmal Burxonov.

Sessiyada, shuningdek, O‘zbekistonning energiya va qayta tiklanadigan manbalarga xorijiy sarmoyalarni jalb etish borasidagi muvaffaqiyatlari muhokama qilindi, barqaror rivojlanishni ta’minlash uchun hukumat islohotlari va ularni globallashuvga moslashtirish muhimligi ta’kidlandi.

“O‘zbekiston taraqqiyot uchun ochiq va xorijiy hamkorlarni jalb qilish uchun barcha zarur resurslarga ega ekanini ko‘rib turibmiz”, – dedi Marokash korxonalari umumiy konfederatsiyasining sobiq prezidenti Selodin Mediar.
 

Xalqaro panel sessiyasining yakuniy muhokamalarida jozibador sarmoyaviy muhitni yaratish uchun korrupsiyaga qarshi kurashda global hamkorlik va tajriba almashish zarurligi ta’kidlandi. Korrupsiyaga qarshi samarali siyosatning mamlakatning iqtisodiy xavfsizligi va xorijiy investorlar uchun jozibadorligiga ta'siri muhim deb ataldi.

Ishtirokchilar bunday tadbirlar xalqaro standartlarni mustahkamlash va shaffoflikni oshirishga yordam berishiga, jahon iqtisodiyotining barqaror rivojlanishi va farovonligiga olib kelishiga umid bildirdi.