O'zbekiston Respublikasi Vazirlar Mahkamasi huzuridagi Migratsiya agentligi

Avvalo, O‘zbekiston Respublikasi Vazirlar Mahkamasi huzuridagi Migratsiya agentligi nomidan va shaxsan o‘z nomimdan, sizlarni bugungi tarixiy voqea – “Germaniya tibbiyot akademiyasi”ning ochilishi bilan chin dildan tabriklayman!

Bugun biz nafaqat yangi ta’lim muassasasi eshigini ochayapmiz. Biz – ikki xalq do‘stligini, ilm va insonparvarlikni birlashtirgan yangi davrni boshlayapmiz.

So‘nggi ikki yil ichida O‘zbekiston va Germaniya o‘rtasida tibbiyot va mehnat migratsiyasi sohasida keng qamrovli hamkorlik tizimi yaratildi. 2024-yil sentyabrda, Samarqand shahrida O‘zbekiston Respublikasi Prezidenti Shavkat Mirziyoyev va Germaniya Federal Kansleri Olaf Shols ishtirokida “Migratsiya va mobillik bo‘yicha hamkorlik to‘g‘risidagi Bitim” imzolandi. Bu kelishuv ikki davlat o‘rtasida mehnat resurslari almashinuvini tizimli yo‘lga qo‘yish, xususan, tibbiyot kadrlarini xalqaro standartlarda tayyorlashga zamin yaratdi.

Xabaringiz bor, Migratsiya agentligi 2021-yilda Shveysariyaning Globogate Concept AG kompaniyasi bilan o‘zaro hamkorlik bitimini imzolagan edi. Shunda, loyiha faqatgina Toshkent shahrida tashkil etilgan edi.
Keyinchalik, hududlar soni kengayib, qo‘shimcha tarzda, Andijon, Qarshi va Namangan viloyatlarida ham qo‘shma o‘quv kurslarini tashkil etdik. Bu albatta oson bo‘lmadi. Loyihani o‘zbekistonlik asoschisi Gulnora Asatullayevna ham bu gaplarimni tasdiqlaydi.

Umuman olganda, hamkorlik doirasida 2023–2025-yillarda Globogate bilan hamkorlikda mazkur hududlarda 1200 nafar hamshira nemis tili va kasbiy tayyorgarlik kurslarini tamomladi. Hozirda o‘quv jarayonlari davom etmoqda. Ularda 590 nafar fuqarolar o‘qitilmoqda.

Shu paytga qadar 450 nafar bitiruvchi Germaniya klinikalarida – xususan Aaxen universitet klinikasi, Asklepios, Enzkreis, Salus Altmark, Karls-rue gospitallarida ish faoliyatini boshladi.

Ular ayni vaqtda Germaniyada hamshira va hamshira yordamchisi sifatida ishlamoqda va ish haqi o‘rtacha 2500 yevroni tashkil etmoqda. Ushbu tajriba orqali O‘zbekiston va Germaniyada tibbiyot kadrlarini tayyorlash tizimidagi farqlarni aniqlash imkoni bo‘ldi.

Shuning uchun biz xalqaro muvofiqlashtirilgan, uch yillik ta’lim dasturiga asoslangan yagona modelni yaratishga kirishdik. Deyarli bir yil davomida – Agentlik, Oliy ta’lim, Sog‘liqni saqlash vazirliklari, Globogate va Aaxen universitet klinikasi bilan hamkorlikda xalqaro hamshiralik ta’lim dasturi ishlab chiqildi.

Dasturga Germaniyaning 5 ta tafovut amaliy tibbiy fanlari kiritildi. Nemis tili soatlari uch barobar oshirildi. Ta’lim jarayoni to‘liq Germaniya standartlariga moslashtirildi. Bu tashabbusga o‘z hissasini qo‘shgan barcha hamkorlarga samimiy minnatdorlik bildiraman. 2025/2026 o‘quv yili uchun muhtaram Prezidentimiz tomonidan 750 ta maxsus kvota ajratildi. Keyingi o‘quv yilida bu ko‘rsatkichni 1 500 ta kvotagacha oshirishni rejalashtirmoqdamiz.

Bu Akademiyada tahsil olgan yoshlar B2 darajadagi nemis tili sertifikati bilan bitiradi va ularning diplomi Germaniyada to‘g‘ridan to‘g‘ri hamshira sifatida ishlash huquqini beradi.

Shu bilan, bugungacha ketgan kadrlar ilk 7-8 oy mobaynida “hamshira yordamchisi” sifatida ishlab so‘ngra litsenziya olgan bo‘lsa, endilikda mazkur akademiya bitiruvchilari O‘zbekistonni o‘zida Germaniyada to‘liq tan olingan tibbiyot mutaxassisi sifatida ishga jo‘natiladi.

Hurmatli ishtirokchilar, bugungi ochilish nafaqat yangi ta’lim muassasasining ochilishi emas, balki yangi tarixning boshlanishidir.

Bu loyiha yoshlarimizga – bilim, xalqimizga – shifo, mamlakatimizga – shon-sharaf olib keladi.

Migratsiya agentligi sifatida biz ushbu tashabbusni qo‘llab-quvvatlashni va uni yanada kengaytirishni davom ettiramiz.