O‘zbekistonlik tibbiyot xodimlari Italiyada ish faoliyatini boshladilar
2025-10-13 16:50:00 / Yangiliklar
Bu loyiha O‘zbekiston va Italiya o‘rtasida mehnat migratsiyasi sohasidagi hamkorlikni rivojlantirish va tibbiyot sohasi mutaxassislariga Yevropa davlatlarida qonuniy hamda xavfsiz mehnat faoliyatini ta’minlashni maqsad qiladi.
Xalqaro hamkorlikning yangi bosqichi
Joriy yil may oyida Italiya Bosh vaziri Jorjiya Meloni xonimning mamlakatimizga rasmiy tashrifi doirasida Migratsiya va mobillik to‘g‘risidagi Anglashuv memorandumi imzolangan edi.
Shuningdek, iyul oyida O‘zbekiston Respublikasi Prezidenti Shavkat Mirziyoyev Toshkent investitsiya forumida ishtirok etgan Lombardiya viloyati gubernatori Attilio Fontana bilan uchrashuvi chog‘ida, ikki mamlakat hududlari o‘rtasida keng ko‘lamli sheriklikni rivojlantirish va qo‘llab-quvvatlash masalalari muhokama qilingan.
Muzokaralar va kelishuvlar natijasi
Mazkur kelishuvlarni amaliyotga tatbiq etish maqsadida Migratsiya agentligi rahbariyati Italiyaga xizmat safari chog‘ida Lombardiya viloyati gubernatori Attilio Fontana, Italiya Sog‘liqni saqlash vaziri Gvido Bertolazo hamda bir qator idora va kompaniyalar vakillari bilan uchrashuvlar o‘tkazdi.
Muzokaralar yakunida mehnat migratsiyasi bo‘yicha besh yillik hamkorlik rejasi tuzildi. Unga muvofiq, 2026-yilda 3,5 ming nafar o‘rta tibbiyot xodimlari tayyorlanishi rejalashtirilgan.
Pilot loyiha doirasida Toshkent va Samarqand shaharlaridan tanlab olingan 10 nafar o‘rta tibbiyot xodimlari tilga tayyorgarliksiz sinov tariqasida yuqori maoshli 3 oylik ish faoliyatini Italiyada boshladilar. Ular ish jarayonida italyan tilini o‘rganish hamda mahalliy tibbiyot tizimiga moslashish imkoniyatlarini o‘rganadilar.
Ta’lim va malaka almashinuvi
Pilot dasturning asosiy maqsadi — O‘zbekiston va Italiya tibbiyot tizimlari o‘rtasidagi farqlarni tahlil qilish, ish usullarini taqqoslash va kelgusida samarali integratsiyani ta’minlashdan iborat. Shuningdek, italyan tiliga ko‘nikma va ishga moslashish davrini belgilash imkoniyati tug‘iladi.
Italiyalik mutaxassislar ham o‘z navbatida o‘zbekistonlik tibbiyot xodimlarini malakasini baholaydi. Sinov tariqasida yuborilgan ilk guruh O‘zbekistonga qaytganidan so‘ng, kasb xususiyatidan kelib chiqib, hamkorlikda maxsus o‘quv dasturi ishlab chiqiladi va keyinchalik Italiyada ishlash istagini bildirgan 3500 nafar o‘rta tibbiyot xodimlari shu dastur asosida O‘zbekistonda o‘qitilib, Italiyaga ishga joylashtiriladi.
Xalqaro e’tirof va istiqbollar
Italiyaning yetakchi nashrlari bu tashabbusni “hamkorlik va inson salohiyatini rivojlantirish modeli” sifatida e’tirof etdi. Shu bilan birga, O‘zbekiston tibbiyot tizimiga yuqori baho berilgan hamda xodimlarining malakasiga ehtiyoj ortib borayotgani qayd etilgan.
Migratsiya agentligi tomonidan mazkur yo‘nalishdagi ishlar izchil davom ettirilib, kelgusida boshqa Yevropa davlatlari bilan ham tibbiyot mutaxassislarini ishga yuborish bo‘yicha qo‘shma loyihalarni amalga oshirish rejalashtirilgan.
Bu tashabbus – mehnat migratsiyasida insonparvar va tizimli yondashuvni hayotga tatbiq etish, hamda yurtimiz mutaxassislariga xalqaro mehnat bozorida munosib o‘rin egallash imkoniyatini yaratishga xizmat qiladi.