O'zbekiston Respublikasi Vazirlar Mahkamasi huzuridagi Migratsiya agentligi

Assalomu alaykum, hurmatli ommaviy axborot vositalari vakillari, aziz yurtdoshlar!

Bugun xorijda ishlash istagida bo‘lgan fuqarolarimiz uchun muhim yangilikni e’lon qilmoqchimiz.

Migratsiya agentligi tomonidan fuqarolarni xorijda ishga joylashtirish bilan bog‘liq xizmatlar narxlari keskin arzonlashtirildi.

Eng muhimi, bu o‘zgarishlar bugun, 2026-yil 20-oktabrdan kuchga kirdi. Bu tartib 20-oktabrga qadar tuzilgan shartnomalar uchun amal qilmaydi.

Mazkur yangilik xorijda qonuniy mehnat faoliyatini amalga oshirish istagida bo‘lgan fuqarolarimizning ortiqcha xarajatlarini qisqartirish, ular uchun yanada qulay va moliyaviy jihatdan yengil shart-sharoitlar yaratishga qaratilgan.

Ma’lumki, so‘nggi yillarda Prezidentimiz tashabbusi bilan xorijda vaqtincha mehnat faoliyatini amalga oshirish tizimini takomillashtirish, fuqarolarimizni kasb va xorijiy tillarga tayyorlash, ularni munosib ish o‘rinlariga yo‘naltirish hamda huquq va manfaatlarini himoya qilish borasida keng ko‘lamli islohotlar amalga oshirilmoqda.

Xususan, davlatimiz rahbarining 2024-yil 17-oktabrdagi PF–162-son Farmoni hamda PQ–367-son qarori bilan migratsiya jarayonlarini boshqarish tizimini isloh qilish, xorijda qonuniy mehnat qilish imkoniyatlarini kengaytirish va fuqarolarga ko‘rsatiladigan xizmatlar sifatini oshirish bo‘yicha muhim vazifalar belgilangan.

Migratsiya agentligi tomonidan xizmat tariflarining qayta ko‘rib chiqilishi ham ana shu islohotlarning mantiqiy davomi bo‘lib, fuqarolar uchun amaliy yengilliklar yaratishga xizmat qiladi.

Jumladan, Agentlik direktorining 2026-yil 19-oktabrdagi 114-sonli buyrug‘i bilan jo‘nab ketishdan oldingi o‘qitish (moslashtirish) va xorijda ishga joylashtirish xizmatlari uchun yangi tariflar tasdiqlandi.

Endi eng muhim o‘zgarishlarga batafsil to‘xtalamiz.

Janubiy Koreyaga ishga joylashtirish xizmatlari narxlari sezilarli darajada pasaytirildi.

Xususan, Janubiy Koreyaga E-9 vizasi asosida ishga yuboriladigan fuqarolar uchun xizmat haqi avval bazaviy hisoblash miqdorining 50 baravari etib belgilangan bo‘lsa, endilikda ushbu to‘lov 5 baravarga, ya’ni 500 foizga kamaytirilib, 10 BHM etib belgilandi.

Oddiy qilib aytganda, amaldagi bazaviy hisoblash miqdori bo‘yicha avval 22 million so‘mni tashkil etgan xizmat haqi endi 4 million 400 ming so‘mga tushirildi.

Bu degani, har bir fuqaro ushbu xizmatlar uchun avvalgi tarifga nisbatan 17 million 600 ming so‘m kam to‘laydi.

E-7 vizasi asosida ishga joylashtiriladigan fuqarolar uchun esa yangi tarif 10 BHM, ya’ni 4 million 400 ming so‘mni tashkil etadi.

Bu o‘zgarishlar Janubiy Koreyada qonuniy mehnat qilish istagida bo‘lgan fuqarolarimiz uchun dastlabki moliyaviy xarajatlarni kamaytirishga xizmat qiladi.

Yevropa davlatlari, Rossiya Federatsiyasi va arab davlatlariga ishga joylashtirish xizmatlari bepul.

Ushbu davlatlarga Migratsiya agentligi orqali tashkiliy tartibda ishga yuboriladigan fuqarolardan Agentlik tomonidan ko‘rsatiladigan xizmatlar uchun 2026-yil 31-dekabrga qadar to‘lov undirilmaydi.

Ya’ni, fuqarolarimiz ushbu yo‘nalishlarda Agentlikning ishga joylashtirish xizmatlaridan bepul foydalanishlari mumkin.

Bunda xorijiy ish beruvchilar bilan tuzilgan shartnomalarda nazarda tutilgan hollarda xizmat haqi ish beruvchi tashkilotlar tomonidan qoplanishi mumkin.
 

Boshqa qator davlatlarga ishga joylashtirish xizmatlari uchun ham yangi, maqbul tariflar belgilandi. Jumladan:

Belarus Respublikasiga — 44 ming so‘m;

MDHning Rossiyadan tashqari davlatlari va Mongoliyaga — 440 ming so‘m;

Gruziyaga — 880 ming so‘m;

Turkiyaga — 1 million 320 ming so‘m.

Yaponiyaga texnologiyalar, gumanitar bilimlar va xalqaro ishlar yo‘nalishida ishga joylashtiriladigan oliy ta’lim muassasalari bitiruvchilari uchun xizmat haqi 440 ming so‘m etib belgilandi.

Yaponiyaning maxsus malakali ishchi va texnik stajirovka dasturlari bo‘yicha esa xizmat to‘lovi 4 million 400 ming so‘mni tashkil etadi.

Shu o‘rinda bir muhim jihatni ta’kidlab o‘tish zarur.

Mazkur tariflar aynan Migratsiya agentligi tomonidan ko‘rsatiladigan xizmatlarga taalluqli. Viza rasmiylashtirish, aviachiptalar, tibbiy ko‘rik va boshqa xarajatlar tegishli dastur hamda mehnat shartnomasi shartlariga muvofiq alohida bo‘lishi mumkin.
 

Hurmatli yurtdoshlar!

Xorijda ishlashga qaror qilgan har bir inson uchun dastlabki xarajatlar muhim ahamiyatga ega. Ayniqsa, ishga joylashish, hujjatlarni rasmiylashtirish va safarga tayyorgarlik ko‘rish jarayonidagi moliyaviy yuk oila budjetiga bevosita ta’sir qiladi.

Shu bois Migratsiya agentligi tomonidan xizmat narxlarining pasaytirilishi fuqarolarimizning ortiqcha xarajatlarini qisqartirishga qaratilgan muhim amaliy qadamdir.
 

Bizning asosiy maqsadimiz — xorijda qonuniy ishlash imkoniyatlarini yanada kengaytirish, fuqarolarimiz uchun xizmatlarni qulay, shaffof va moliyaviy jihatdan maqbul qilishdir.

Shu bilan birga, xorijiy ish beruvchilar bilan hamkorlikni mustahkamlash, yangi ish o‘rinlarini jalb qilish, fuqarolarimizni kasb va xorijiy tillarga tayyorlash hamda ularning mehnat huquqlarini himoya qilish borasidagi ishlar yanada rivojlantiriladi.

Fuqarolarimizdan xorijda ishlash bo‘yicha faqat rasmiy manbalardagi ma’lumotlarga tayanishni, xizmat to‘lovlari va mehnat shartnomasi shartlari bilan oldindan tanishishni so‘raymiz.

Yangi tariflar haqida batafsil ma’lumotlarni Migratsiya agentligining rasmiy veb-sayti, ijtimoiy tarmoqlardagi sahifalari hamda 1282 qisqa raqami orqali olish mumkin.

E’tiboringiz uchun rahmat!