Bugungi brifingda Vazirlar Mahkamasi huzuridagi Migratsiya agentligi tomonidan 2026-yilning iyul–sentabr oylarida qonunchilik hujjatlari va topshiriqlar ijrosi doirasida amalga oshirilgan ishlar haqida ma’lumot beramiz.

Joriy yilning III choragida Migratsiya agentligiga jami 394 ta topshiriq belgilandi.

Jumladan, O‘zbekiston Respublikasi Prezidenti tomonidan qabul qilingan 68 ta hujjat asosida 135 ta, Prezident Administratsiyasi rahbarining 30 ta hujjati asosida 44 ta, Vazirlar Mahkamasining 62 ta hujjati asosida 211 ta topshiriq ijroga qaratildi.

Bugungi kunga qadar belgilangan topshiriqlar ijrosi to‘liq va sifatli ta’minlab kelinmoqda.

Ular doirasida asosiy e’tibor xorijda ishlash istagidagi fuqarolar uchun qonuniy va munosib mehnat imkoniyatlarini kengaytirish, yangi tashqi mehnat bozorlarini ochish, xorijiy ish beruvchilar bilan to‘g‘ridan-to‘g‘ri hamkorlikni kuchaytirish, nomzodlarni kasb va xorijiy tillarga maqsadli tayyorlash, shuningdek, xorijda ishlayotgan yurtdoshlarimizning huquq va manfaatlarini himoya qilishga qaratildi.
 

Birinchi yo‘nalish — tashqi mehnat bozorlarini diversifikatsiya qilish.

Hisobot davrida Germaniya, Buyuk Britaniya, Italiya, Fransiya, Yaponiya, Koreya Respublikasi va boshqa davlatlar bilan hamkorlik kengaytirildi. AQSh, Italiya, Shvetsiya, Fransiya va Sloveniya yangi mehnat yo‘nalishlari sifatida qo‘shildi.

Joriy yilda 42 ta davlatdagi 716 ta ish beruvchi va rekruting tashkiloti bilan muzokaralar o‘tkazilib, 132 ta yangi shartnoma imzolandi.

Xorijiy davlatlarning vakolatli tashkilotlari bilan muzokaralar natijasida o‘rtacha 1 ming 500 AQSh dollari va undan yuqori ish haqi taklif etiladigan 262 ming 200 ta yangi ish o‘rni aniqlandi.

Mavsumiy mehnat yo‘nalishlari ham kengaytirildi. Ilk bor 7 ta davlat bilan qishloq xo‘jaligi va xizmat ko‘rsatish sohalarida mavsumiy ishchilarni jalb etish bo‘yicha 12 ta bitim imzolanib, jami 13 mingta ish o‘rni bo‘yicha kelishuvlarga erishildi.

Fuqarolarimizni an’anaviy mehnat yo‘nalishlari bilan bir qatorda yuqori malaka talab etadigan sohalarga jalb qilishga ham alohida e’tibor qaratilmoqda.

Xususan, xalqaro kruiz kemalari, axborot texnologiyalari va aviatsiya sohalarida yangi yo‘nalishlar ochildi, tibbiyot, logistika va payvandlash sohalaridagi imkoniyatlar kengaytirildi. Ushbu yo‘nalishlarda jami 47 mingta ish o‘rni aniqlandi.

Amalga oshirilgan ishlar natijasida joriy yilda 171 ming 200 nafar fuqaro xorijdagi ish o‘rinlariga joylashtirildi.
 

Ikkinchi muhim yo‘nalish — nomzodlarni ish beruvchilar talabiga mos tayyorlash.

Xorijiy mehnat bozorida til biladigan va kasbiy malakaga ega mutaxassislarga talab yuqoriligidan kelib chiqib, 33 ming 300 nafar nomzod xorijiy tillar va talab yuqori bo‘lgan kasblarga o‘qitishga jalb qilindi.

Xorijiy kompaniyalar bilan hamkorlikda «kasb + til» tamoyili asosidagi qo‘shma ta’lim loyihalarida 5 ming 700 nafar fuqaro tayyorlanmoqda.

Qurilish, transport, mehmonxona xizmati, oshpazlik, tibbiyot va boshqa talab yuqori bo‘lgan sohalarda maqsadli tayyorlash tizimi yo‘lga qo‘yildi.
 

Uchinchi yo‘nalish — ishga joylashish jarayonlarini soddalashtirish va fuqarolarni manzilli qo‘llab-quvvatlash.

«Xorijda ish» axborot tizimida kasb va xorijiy tilni biladigan nomzodlar uchun soddalashtirilgan elektron portfel shakllantirish hamda «ish beruvchi — fuqaro» o‘rtasida to‘g‘ridan-to‘g‘ri muloqot mexanizmi joriy etildi.

Hozirda ish beruvchilar talabiga mos 90 mingdan ortiq nomzodning elektron portfeli shakllantirilgan.

Hududlarda 43 ta mehnat yarmarkasi va 1 ming 300 ta tanlov tashkil etilib, ularda 231 mingdan ortiq fuqaro ishtirok etdi.

Fuqarolarni ijtimoiy qo‘llab-quvvatlash bo‘yicha ham manzilli choralar ko‘rildi. Xususan, 11 ming 500 nafar fuqaroning ishchi viza, yo‘l chiptasi, xorijiy til yoki malaka sertifikati hamda sug‘urta bilan bog‘liq xarajatlari Migratsiya jamg‘armasi mablag‘lari hisobidan qoplab berildi.
 

Xalqaro hamkorlikning huquqiy asoslarini mustahkamlash bo‘yicha ham qator natijalarga erishildi.

Joriy yilda fuqarolarni xorijda ishga joylashtirish sohasida 7 ta xorijiy davlat bilan kelishuvlar imzolandi.

Avstriya, Shvetsiya, Belarus, Yaponiya, Gruziya, Serbiya va Chexiya bilan mehnat mobilligi, fuqarolarni tashkiliy tarzda ishga joylashtirish hamda malakali kadrlar tayyorlash bo‘yicha yangi huquqiy mexanizmlar shakllantirildi.
 

Migratsiya agentligi qonunchilik hujjatlari, O‘zbekiston Respublikasi Prezidenti va Hukumat topshiriqlarining o‘z vaqtida va sifatli ijrosini ta’minlash, amalga oshirilayotgan ishlar haqida jamoatchilikka ochiq axborot berib borish, eng muhimi, fuqarolar uchun qonuniy, xavfsiz va munosib mehnat imkoniyatlarini kengaytirish bo‘yicha ishlarni izchil davom ettiradi.