☀️Anomal issiq bo‘yicha ogohlantirish: o‘zingizni, tabiatni va barcha tirik mavjudotlarni asrang!
2026-07-17 09:00:00 / Ekofaol xodim
Gidrometeorologiya xizmati agentligi ma’lumotlariga ko‘ra, 18–20-iyul kunlari O‘zbekiston hududiga janubdan o‘ta issiq havo massalarining kirib kelishi davom etadi. Respublika bo‘yicha havo harorati 43–45°C gacha, janubiy va cho‘l hududlarining ayrim joylarida esa 46–48°C gacha ko‘tarilishi kutilmoqda. Shamol tezligi 13–18 m/s gacha, ayrim joylarda 20–22 m/s gacha kuchayadi. Ba’zi hududlarda chang va qum bo‘ronlari kuzatilishi mumkin.
Bu kunlarda o‘z salomatligingiz hamda yaqinlaringiz xavfsizligiga alohida e’tibor qaratish muhim. Imkon qadar kunning eng issiq vaqtlarida ochiq quyosh ostida bo‘lmaslik, yetarli miqdorda suyuqlik iste’mol qilish va zarur ehtiyot choralariga rioya etish tavsiya etiladi.
Anomal issiq nafaqat insonlar, balki atrof-muhit uchun ham jiddiy xavf tug‘diradi. Yuqori harorat daraxt va butalarning qurib qolishiga, yashil hududlar holatining yomonlashishiga, yosh ko‘chatlarning nobud bo‘lishiga hamda hayvonot olamiga salbiy ta’sir ko‘rsatishi mumkin.
Bugun saqlab qolingan har bir daraxt, sug‘orilgan har bir ko‘chat va o‘z vaqtida ko‘rilgan har bir chora mamlakatimizning ekologik xavfsizligi hamda barqaror kelajagiga qo‘shilgan munosib hissadir.
O‘zingizni, yaqinlaringizni va tabiatni asrang!