O'zbekiston Respublikasi Vazirlar Mahkamasi huzuridagi Migratsiya agentligi

Amerikadagi kompaniya sifatida biz Oʻzbekiston hukumati bilan hamkorlikni yoʻlga qoʻydik va Oʻzbekistondan koʻplab ishchilarni Amerika Qoʻshma Shtatlariga fermerlar uchun ishlashga olib borishni istaymiz.

Biz AQSH boʻylab taxminan 1400 ta fermerga xizmat koʻrsatamiz va ularni ishchi kuchi bilan taʼminlaymiz. Oʻzbekistonlik ishchilarni ham fermerlarimizga taklif qilishni juda xohlaymiz. Fermerlar doim yangi va ishonchli mehnat bozorini qidirishadi.

Biz oʻzbekistonlik ishchilar mehnatkash, oilaparvar, masʼuliyatli va yaxshi malakaga ega insonlar ekanini bildik. Ular tajribali, yaxshi oʻqitilgan va koʻpchiligi xorijda ishlash tajribasiga ham ega. Biz eng yaxshi mutaxassislarni tanlab, ularni AQSHdagi fermerlarimizga ishga joylashtirishimiz mumkinligiga ishonamiz.

Bizning fermerlar turli sohalar bilan shugʻullanishadi. Ayrimlari katta yer maydonlariga ega boʻlib, yer haydash, dorilash, hosil yigʻish va yuk tashish ishlarini amalga oshirishadi. Boshqalari esa chorvachilik bilan shugʻullanadi, baʼzilarida ekinchilik ham, chorvachilik ham mavjud.

Biz asosan malakali va yarim malakali ishchilarni qidirmoqdamiz. Shuning uchun tajribasi tasdiqlanadigan, bilimli insonlar kerak boʻladi. Bu juda yaxshi imkoniyat.

Shuningdek, kombayn haydovchilari jamoalari ham bor. Ular Texasdan to Shimoliy Dakotagacha yurib, boshqa fermerlar uchun hosil yigʻishadi. Ular pudratchi sifatida ishlashadi va bu ishlar uchun ham haydovchilar va ishchilar kerak boʻladi.

Bundan tashqari, fermerlarga xizmat koʻrsatuvchi maxsus kompaniyalar ham bor. Ular toʻsiq qurish, don saqlash omborlari barpo qilish kabi ishlar bilan shugʻullanishadi. Ayrimlari oʻgʻit tarqatish ishlarini amalga oshirishadi — ishchilar oʻgʻitni yuklab, minglab gektar maydonlarga tarqatishadi.

Yana boshqalar mineral oʻgʻit sepish bilan shugʻullanadi. Hatto ekinlarga havodan dorilash ishlarini amalga oshiradigan mijozlarimiz ham bor. Agar sizlarda shunday uchuvchilar boʻlsa, bu sohada maosh juda yuqori — soatiga toʻlanadigan haqiqatan ham katta ish haqlari mavjud.

Hozircha qisqacha aytganda vaziyat shu. Menimcha, bu juda yaxshi imkoniyat. Biz odamlar nimalarni bilishini oʻrganyapmiz va asta-sekin koʻproq maʼlumot toʻplayapmiz. Bizga oʻzbekistonlik ishchilarni rasmiy taklif qilish uchun “yashil chiroq” berilgan.

Kecha sizlardagi oʻquv markazini koʻrish nasib qildi. Oʻzbekiston hukumati mamlakat boʻylab turli kasblarga oʻqitadigan markazlar tashkil qilgani juda taʼsirli ekan. Men u yerda yuk koʻtaruvchi texnika boʻyicha oʻquv jarayonini koʻrdim. Shuningdek, santexnika va elektr ishlari boʻyicha ham oʻquvlar bor ekan.

Bunday koʻk yoqali, yarim malakali va malakali mutaxassislar bizga juda kerak. Masalan, santexnika, mexanika, texnika taʼmiri, jihozlarga texnik xizmat koʻrsatish kabi sohalarda bilimli odamlar zarur. Ayrimlar esa katta texnikalarni toʻliq ajratib, ehtiyot qismlarini almashtira oladigan yuqori malakali mutaxassislar boʻlishi mumkin.

Shuningdek, men sizlarda koʻplab John Deere traktorlari va texnikalarini koʻrdim. Balki Yevropada ishlab chiqarilgan variantlari ham bordir. Amerikada ham bu texnikalar juda keng tarqalgan.