Qonun (O‘RQ–1095-son, 11.11.2025 y.) bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritildi.
2025-11-12 18:00:00 / Yangiliklar
Qonun migratsiya va bandlik sohasidagi hujjatlarni yanada takomillashtirishga, shuningdek xususiy bandlik agentliklari faoliyatining oshkoraligi va samaradorligini oshirishga qaratilgan.
Migratsiya va bandlik sohasidagi qonunchilik yanada takomillashtirildi. Unga ko‘ra, Migratsiya agentligining vakolatlari aniqlashtirildi, xususiy bandlik agentliklarining huquq va majburiyatlari kengaydi.
Yangi tartibga ko‘ra Xususiy bandlik agentliklari to‘g‘risidagi qonunni buzish holatlari Migratsiya agentligi tomonidan ko‘rib chiqiladi. (50¹-moddasida nazarda tutilgan huquqbuzarliklar) Buning uchun Ma’muriy javobgarlik to‘g‘risidagi kodeksga 255¹-modda kiritildi.
Ma’muriy jarima solish huquqi Migratsiya agentligi direktori hamda uning o‘rinbosarlariga beriladi.
"Xususiy bandlik agentliklari to‘g‘risida"gi Qonundagi o‘zgarishlarga ko‘ra, xususiy bandlik agentliklari yangi huquq va majburiyatlarga ega bo‘ldi. Endi agentliklar ish izlovchilar uchun kasbiy tayyorgarlik va xorijiy til kurslarini tashkil etish, chet el ish beruvchilarini jalb etishga haqli.
Yangi majburiyatlar
Xorijda ish qidirayotgan fuqarolarga xizmat ko‘rsatuvchi xususiy bandlik agentliklari faoliyati endi kuchaytirilgan moliyaviy kafolatlar asosida amalga oshiriladi.
Xususiy bandlik agentliklari o‘z faoliyatini boshlashdan oldin: Bazaviy hisoblash miqdorining 4 000 barobari miqdoridagi mablag‘ni tijorat bankidagi maxsus depozit hisobvaraqqa litsenziya amal qilish davriga qadar joylashtirishi shart.
Ushbu mablag‘ni Migratsiya agentligi roziligisiz sarflash mumkin emas. Agar mablag‘ sarflangan bo‘lsa, Xususiy bandlik agentligiga belgilagan muddatda uni to‘liq tiklash talab etiladi.
Ushbu Mablag‘ — Xususiy bandlik agentligi faoliyatining kafolati xisoblanadi.
Depozitga joylashtirilgan mablag‘: xususiy bandlik agentligining qonun talablariga to‘liq rioya qilishining moliyaviy kafolatidir shuningdek, faoliyati natijasida fuqarolarga yetkazilishi mumkin bo‘lgan zararni qoplash manbai hisoblanadi.
Bu mablag‘ bank, Migratsiya agentligi va agentlikning o‘zi o‘rtasida tuzilgan maxsus shartnoma asosida saqlanadi.
Mablag‘larni Migratsiya jamg‘armasiga o‘tkazish tartibi
Agar xususiy bandlik agentligi qonun buzilishi yoki fuqarolar manfaatlariga zarar yetkazgani aniqlansa: Migratsiya agentligi asoslangan talabnoma kiritadi; Bunday xolatda. Agentlik bankdagi depozitdan mablag‘ni Migratsiya jamg‘armasiga o‘tkazishi shart. Agar talabnoma ixtiyoriy bajarilmasa, tijorat banki: talabnomada ko‘rsatilgan summani depozitdan olib, keyingi ish kunidan kechiktirmay Migratsiya jamg‘armasiga o‘tkazadi.
Bu mexanizm: fuqarolarning huquqlarini himoya qiladi;
xususiy bandlik agentliklari mas’uliyatini oshiradi;
xorijda vaqtincha mehnat faoliyatini olib borayotgan fuqarolar bilan bog‘liq xavflarni kamaytiradi;
xizmat ko‘rsatish sohasida shaffoflikni ta’minlaydi.
Shuningdek, Agentliklar xorijga yuborilgan fuqarolarning mehnat faoliyatini nazorat qilishga majbur agar mehnat sharoiti yoki maosh bilan bog‘liq muammo yuzaga kelsa tezda yangi ish beruvchi topishi, yoki fuqaroni O‘zbekistonga qaytarishni tashkil etishi shart. Fuqarolarni qaytarish xarajatlari — agentlikning rezerv mablag‘lari hisobidan qoplanadi.
Ushbu o‘zgarishlar mehnat migratsiyasi xavfsizligini ta’minlash, agentliklar mas’uliyatini oshirish va fuqarolar huquqlarini yanada kuchliroq himoya qilishga qaratilgan.