9-dekabr – Xalqaro korrupsiyaga qarshi kurash kuni munosabati bilan “Ochiq eshiklar” kuni o‘tkazildi
2025-12-09 11:00:00 / Vazirlik yangiliklar
9-dekabr — Xalqaro korrupsiyaga qarshi kurashish kuni munosabati bilan Samarqand viloyati Qurilish va uy-joy kommunal xoʻjaligi bosh boshqarmasida “Ochiq eshiklar kuni” tadbiri oʻtkazildi. Tadbirda bosh boshqarma rahbariyati, viloyat prokuraturasi masʼul xodimi hamda boshqarma apparati xodimlari ishtirok etdi. Shuningdek, barcha tuman va shahar boʻlimlari zoom platformasi orqali onlayn tarzda qatnashdi.
Tadbir davomida mamlakatimizda korrupsiyaga qarshi kurashish borasida amalga oshirilayotgan ishlar, xususan, qurilish sohasida shaffoflik va ochiqlikni taʼminlash maqsadida joriy etilgan “Shaffof qurilish” milliy axborot tizimi ahamiyati atroflicha yoritib berildi. Taʼkidlanishicha, bu tizim soha faoliyatida ochiqlikni taʼminlashda muhim samaralar berayotir.
Bosh boshqarmada shaffoflik prinsiplari bosqichma-bosqich joriy etilib, barcha yoʻnalishlar boʻyicha amalga oshirilayotgan ishlar haqidagi maʼlumotlar rasmiy veb sayt, ijtimoiy tarmoqlar va ommaviy axborot vositalari orqali jamoatchilikka muntazam yetkazib borilmoqda.
Joriy yil davomida viloyatda budjet mablagʻlari hisobidan 811 ta obyektda qurilish ishlari boshlanib, loyiha tashkilotlari tomonidan mualliflik nazorati belgilangan tartibda amalga oshirilmoqda.
Shaharsozlik yoʻnalishidagi 7 ta davlat xizmati toʻliq raqamlashtirilgan boʻlib, ular inson omilisiz, elektron tartibda koʻrsatilmoqda. Yer uchastkalarini tadbirkorlarga ajratish, pudrat tashkilotlarini aniqlash hamda obyektlarni foydalanishga topshirish jarayonlari ham “shaffof mexanizm”lar asosida raqamli tarzda amalga oshirilmoqda. “Shaffof qurilish” milliy axborot tizimi boshqa davlat organlarining maʼlumot bazalari bilan integratsiya qilingani fuqarolarga xizmat koʻrsatishda yanada qulaylik va ochiqlik yaratmoqda.
Bundan tashqari Vazirlar Mahkamasining 2025-yil 28-martdagi 192-son qarori ijrosi doirasida tuman va shaharlarga 19 dona PAD 6000M2 planshetlari topshirilib, nazorat mexanizmlarini kuchaytirish imkoni yaratildi.
Shuningdek, viloyatda boshqaruv servis kompaniyalari faoliyatini raqamlashtirish maqsadida “REALSOFT” kompaniyasi hamkorligida “Shaffof uy” elektron platformasi ishlab chiqilib, koʻp qavatli uylarga xizmat koʻrsatuvchi boshqaruv organlarida joriy etilgan.
Tadbir davomida korrupsiyaning oldini olish, ochiqlik va hisobdorlikni taʼminlash boʻyicha amalga oshirilayotgan ishlar yuzasidan muloqot oʻtkazildi.