Vazirlikda amalga oshirilayotgan raqamlashtirish ishlari tadbirning asosiy mavzularidan biri bo‘ldi
2025-11-20 12:00:00 / Vazirlik yangiliklar
“Shaffof qurilish” milliy axborot tizimi doirasida loyihalarni kelishish, ekspertizadan o‘tkazish, tender jarayonlari, qurilish ishlari nazorati va monitoringi to‘liq elektronlashtirilgani ma’lum qilindi. Tizimning Adliya vazirligi, Ichki ishlar vazirligi, Oliy sud va Kadastr agentligining axborot bazalari bilan integratsiya qilingani inson omilini keskin kamaytirgani ta’kidlandi. Bu orqali o‘tgan 4 yilda davlat budjetida 3,6 trln so‘m tejamkorlikka erishilgani qayd etildi.
Tadbirda “Reyting” va “Tender” elektron platformalarining muhim natijalari ham omma e’tiboriga havola etildi. Pudrat va loyiha tashkilotlarining faoliyatini 4 ta yo‘nalish bo‘yicha inson omilisiz baholaydigan reyting tizimiga 18 mingdan ortiq tashkilot qamrab olingani, ochiq tender tizimida 16 mingdan ziyod xaridlar elektron o‘tkazilgani va har bir tenderda qatnashuvchilar soni o‘rtacha 4 tadan oshgani sohaga raqobat va shaffoflik kirib kelayotganini ko‘rsatadi. Shuningdek, elektron auksionlar orqali bo‘sh yer uchastkalarini taqdim etish tizimi o‘sib borayotgan talabni qondirayotgani ma’lum qilindi.
Shu bilan birga kommunal sohani raqamlashtirish va bu orqali tizimda inson omilini minimallashtirish yuzasidan amalga oshirilgan ishlar bo‘yicha ma’lumot berib o‘tildi.
“Ko‘p kvartirali uylarni boshqarish organlarining elektron reyestri” ma’lumotlar bazasi ishga tushirilib, boshqarish organlari to‘g‘risidagi ma’lumotlar aholiga ochiqlab borilishi yo‘lga qo‘yildi.
“Mening uyim” billing tizimi faoliyati takomillashtirilib, tarif o‘rnatish, murojaatlar bilan ishlash, hisobotlarni berib borish kabi jarayonlar shaffof tarzda amalga oshirilmoqda.
Uylarni boshqarish organlariga biriktirish, boshqaruv organlarini elektron reyestrda ro‘yxatdan o‘tkazish kabi jarayonlarda inson omilini kamaytirish hamda ochiqlikni ta’minlash maqsadida mazkur xizmatlar Davlat xizmatlari orqali amalga oshirilishi yo‘lga qo‘yildi.