Jizzах vilоyati hоkimligi

Korrupsiya — dunyo miqyosida hal etilishi lozim bo‘lgan global muammolardan biri bo‘lib, u har qanday davlat va jamiyatning siyosiy-iqtisodiy rivojlanishiga jiddiy putur yetkazadi. Ushbu illat inson huquq va erkinliklarining poymol bo‘lishiga olib kelayotganini yaxshi bilasiz. Shu bois unga qarshi kurash xalqaro hamjamiyat doirasida katta ahamiyat kasb etib, jahon siyosatining muhim masalalaridan biriga aylangan.

So‘nggi yillarda mamlakatimizda korrupsiyaning oldini olish va unga qarshi kurashish maqsadida barcha sohalarda keng ko‘lamli islohotlar izchil amalga oshirilmoqda.

Hurmatli Prezidentimiz Shavkat Miromonovich Mirziyoyev o‘z ma’ruzalarida:
“Jamiyatimizda korrupsiya, turli jinoyatlarni sodir etish va boshqa huquqbuzarlik holatlariga qarshi kurashish, ularga yo‘l qo‘ymaslik, jinoyatga jazo, albatta, muqarrar ekani to‘g‘risidagi qonun talablarini amalda ta’minlash bo‘yicha qat’iy choralar ko‘rishimiz zarur”, — deb qayta-qayta ta’kidlaydilar.

Korrupsiya va poraxo‘rlik jamiyat barqarorligining muhim asosi bo‘lgan ijtimoiy va huquqiy adolatning yo‘qolishiga sabab bo‘ladi. Mamlakatimiz mustaqilligi, xalqimiz farovonligi, yurtimiz rivoji, gullab-yashnashi va obod bo‘lishi har bir fuqaroning milliy g‘ururi qay darajada shakllanganligiga bog‘liq. Har birimiz, avvalo, pora olish va berish illatidan xalos bo‘lishimiz, boshqacha aytganda, “halollik vaksinasi” bilan emlanishimiz zarur.

Korrupsiyaga nisbatan murosasizlik tamoyiliga amal qilgan holda, hokimlikning barcha xodimlariga bevosita yoki bilvosita, shaxsan yoki vositachilar orqali har qanday korrupsiyaviy harakatlarda ishtirok etish qat’iyan man etiladi. Ya’ni, ular o‘z mansab va xizmat mavqeidan shaxsiy manfaat yo‘lida noqonuniy foydalanishi, shuningdek, xizmat mavqeini suiiste’mol qilishi qat’iy taqiqlanadi hamda qonuniy javobgarlikka tortiladi.

Hokimlik xodimlari odob-axloq qoidalariga qat’iy rioya qilishlari, hokimiyatning obro‘-e’tiboriga, qadr-qimmatiga va nufuziga salbiy ta’sir ko‘rsatadigan har qanday xatti-harakatlardan o‘zlarini tiyishlari shart. Ular, shuningdek, hokimiyat faoliyatining qonuniyligi, xolisligi, hisobdorligi, ochiqligi va shaffofligiga shubha tug‘diradigan holatlarga yo‘l qo‘ymasliklari lozim.

Xodimlar hokimiyat manfaatlariga zid keladigan yoki zid kelishi mumkin bo‘lgan shaxsiy manfaatlar bilan bog‘liq korrupsiyaviy holatlar yuzasidan viloyat hokimligining Korrupsiyaga qarshi ichki nazorat bo‘limini zudlik bilan xabardor qilishlari shart.

Sodir etilgan har qanday korrupsiyaviy jinoyat sirligicha qolmaydi, albatta oshkor bo‘ladi. Shuning uchun men sizlarni ogohlantiraman: har qanday jinoyat uchun jazo muqarrar! Buni har birimiz chuqur anglashimiz zarur.

Hokimlik xodimlari xushmuomala, iltifotli, odobli, e’tiborli, qalbi toza, ko‘ngli ochiq va aql-zakovatli bo‘lishi muhim ahamiyatga ega. Ular fuqarolar va hamkasblari bilan samimiy munosabatda bo‘lishi, bir-birini hurmat qilishi, ish yuzasidan qo‘pollik qilmasligi, o‘z sha’ni va boshqalar qadr-qimmatini qadrlashi shart.

Siz bilan biz birgalikda korrupsiyaga qarshi murosasiz kurash olib boraylik!

Viloyat hokimi v.b.                    U. Mustafoyev