Sharof Rashidov tumani va Jizzax shahridagi yo‘l hamda ijtimoiy obyektlardagi muammolarni o‘rganildi
2024-12-26 09:20:00 / Yangiliklar
Jizzax viloyati hokimi vazifasini bajaruvchi Ulug‘bek Mustafoyev Sharof Rashidov tumani va Jizzax shahridagi yo‘l hamda ijtimoiy obyektlardagi muammolarni o‘rgandi
Dastlab, Sharof Rashidov tumanining Uchtepa hududidagi yo‘l o‘tkazish ko‘prigi va uning atrofidagi bog‘dagi holatlar ko‘zdan kechirildi.Mazkur hududda yoritgichlarning ishlamasligi, kirib kelishda yo‘llarning talabga javob bermasligi va bog‘ hududlaridagi kamchiliklar aytib o‘tildi.
Tuman mudofaa ishlari boshqarmasi binosidagi muammolar ham birma-bir ko‘rsatilib, mazkur holatlarni bartaraf etish bo‘yicha mutasaddilarga ko‘rsatma berildi. Uchtepa mahallasidagi odamlar serqatnov joyga yer osti yo‘li barpo etish bo‘yicha soha vakillari tomonidan o‘rganib, taklif kiritish masalasi aytildi.
Shundan so‘ng, Sharof Rashidov tumani hududidan o‘tgan xalqaro ahamiyatga ega M39 avtomobil yo‘lida joylashgan dam olish maskanlari, mehmonxonalar, ovqatlanish joylari, yo‘lni yoritish vositalari bo‘yicha holatlar ko‘rilib, muammolarni hal etish yuzasidan topshiriqlar berildi.
Shuningdek, o‘rganishlar davomida Jizzax shahri markaziy ko‘chalarini obodonlashtirish, yoritish tizimlarida zamonaviy tejamkor texnologiyalar joriy etish, bozor atrofini tartibga keltirish, piyodalar o‘tish joylarida xavfsizlikni kuchaytirish, savdo xizmat ko‘rsatish markazlarini tartibga keltirib, turli xil ko‘rinishdagi tashqi reklamalarni to‘g‘irlash, bekatlarni yaxshilash, transport xizmatiga e’tibor qaratish bo‘yicha muammolar tanqid ostiga olindi.
Bu boradagi kamchiliklarni tez fursatlarda bartaraf etish yuzasidan mutasaddilarga topshiriqlar berildi.