Jizzах vilоyati hоkimligi

Hududda jami 1609 quti pilla yetishtirish rejalashtirilgan bo‘lib, mavsum yakunida 96 tonna pilla mahsulotlari olish kutilmoqda. Bu ko‘rsatkichlar tumanda ipakchilik tarmog‘iga bo‘lgan e’tibor va tizimli yondashuv natijasidir.

Ayni paytda tumanda 7 ta markazlashgan va 1 ta moslashtirilgan pillaxona faoliyat yuritmoqda. Ushbu maskanlarda pilla parvarishi zamonaviy talablar asosida tashkil etilib, aholiga qulay sharoitlar yaratilgan.

Bugungi kunda 400 dan ortiq xonadonlarda pilla boqilmoqda, natijada 3000 nafardan ziyod xotin-qizlarning bandligi ta’minlandi. Bu esa nafaqat qishloq xo‘jaligi rivojiga, balki aholi daromadlarini oshirishga ham xizmat qilmoqda.

Tumanda ilg‘or tajribalar ham shakllanib bormoqda. Xususan, nafaqat Paxtakor tumanida, balki viloyatda ham birinchilardan bo‘lib pilla yetishtirgan fermerlardan biri — “Azim-Bunyodbek” fermer xo‘jaligi rahbari Islom Mingjigitov hisoblanadi. U o‘z faoliyati orqali nafaqat yuqori hosilga erishdi, balki ijtimoiy mas’uliyatni ham namoyon etdi.

Mazkur xonadonda 8 quti pilla parvarish qilinib, muvaffaqiyatli yetishtirildi. Eng e’tiborlisi, fermer o‘zining 5 nafar oila a’zosi hamda 10 nafardan ortiq qo‘shni ayollarni ish bilan ta’minlab, ularning daromad manbaini yaratdi. Bu kabi tashabbuslar joylarda bandlikni ta’minlash va aholi farovonligini oshirishda muhim omil bo‘lib xizmat qilmoqda.

Hozirgi kunda Paxtakor tumanida pilla yig‘ishtirish ishlari qizg‘in davom etmoqda. Ob-havoning qulay kelishi hamda agrotexnik tadbirlarning o‘z vaqtida amalga oshirilgani yakuniy natijalarning yuqori bo‘lishiga xizmat qiladi.

Umuman olganda, tumanda ipakchilikni rivojlantirish, xonadonlarda qo‘shimcha daromad manbalarini yaratish va xotin-qizlar bandligini ta’minlash borasidagi ishlar izchil davom ettirilmoqda. Bu esa hududning iqtisodiy salohiyatini yanada mustahkamlashga xizmat qiladi.