Xalqaro maydonda yuksak natijalarga erishgan jizzaxlik kikbokschilar taqdirlandi
2026-04-16 19:30:00 / Yangiliklar
Jizzax viloyati hokimi Ulug‘bek Mustafoyev tomonidan sportni rivojlantirishga qaratilgan doimiy e’tibor natijasida viloyat sportchilari respublika, Osiyo va jahon miqyosidagi nufuzli musobaqalarda faol ishtirok etmoqda.
O‘zbekiston kikboksing assotsiatsiyasi Jizzax viloyati bo‘limi ma’lum qilishicha, 2026-yil uchun tasdiqlangan musobaqalar rejasiga muvofiq, joriy yilning 11–15 fevral kunlari yoshlar va kattalar o‘rtasida o‘tkazilgan O‘zbekiston chempionatida viloyatimizdan 40 nafardan ortiq sportchi qatnashib, faxrli birinchi, ikkinchi va uchinchi o‘rinlarni qo‘lga kiritdi. Natijada jami medallar soni 30 taga yetdi.
Mazkur musobaqadan so‘ng viloyatimizdan 5 nafar iqtidorli sportchi — Raymqulov Sultonmurod, Mavlonov Shohjahon, Bo‘riboyev Shohnur, Tojiboyev Ibrohim hamda Normurodov Hoji Akbar joriy yilning 7–12 aprel kunlari Tailandning Bangkok shahrida barcha yosh toifalari o‘rtasida o‘tkazilgan Jahon kubogi musobaqasida ishtirok etdi.
Quvonarlisi, jizzaxlik sportchilar mazkur xalqaro musobaqada ham yuksak mahorat namoyon etib, 3 ta oltin, 1 ta kumush va 1 ta bronza medalini qo‘lga kiritdi.
Yuqori natijalarni qayd etgan sportchilar Jizzax viloyati hokimi nomidan viloyat hokimining o‘rinbosari Sahobiddin Boliyev tomonidan munosib taqdirlandi.
Bu yutuqlar viloyatimizda sport sohasiga qaratilayotgan e’tibor, murabbiylar mehnati va yoshlarning sportga bo‘lgan qiziqishi yuksak darajada ekanini yana bir bor yaqqol namoyon etdi.