Jizzах vilоyati hоkimligi

Uncha katta bo‘lmagan, ixcham va sarishta hovlidagi tomorqa yerlari shundoqqina ko‘rinib turadi. Yerdan unumli foydalanilgan. Ostona xatlab ichkariga kirganingizda esa har tomonda yashnab turgan turli xil gullar ko‘zni quvontiradi. 
 
Ushbu go‘zalliklarning muallifi – ko‘pchilikka “gulchi opa” nomi bilan tanilgan Mohira Abdujabborova. 
 
– Har bir ishda hikmat bor, har qiyinchilikning albatta mukofoti ham bo‘ladi, – deydi Mohira opa. – 2000-yillarda og‘ir kasallikka uchradim. To‘g‘risi, xastalik meni tushkunlikka soldi. Shunday kunlarning birida turmush o‘rtog‘imning xolasi menga ikki tup gul ko‘chati berib: — “Shu bilan shug‘ullaning, ish bilan ovora bo‘lsangiz dardingiz yengillashadi”, — dedi. 
 
Mohira opa gullarni parvarishlash orqali haqiqatan ham dardidan forig‘ bo‘lganini mamnuniyat bilan eslaydi. Ana shu turtki uning gullarga astoydil mehr qo‘yishini ta’minladi va 2005-yildan boshlab faoliyatini kengaytira boshladi. U doimiy ravishda gullarni yetishtirish, ularni to‘g‘ri parvarish qilish borasida izlanishda bo‘ladi, bilmaganini so‘raydi va o‘rganadi. Qisqa vaqt ichida avval mahalladoshlar, keyinchalik viloyatning turli hududlaridan xaridorlar kela boshlaydi. Havas uchun boshlangan ish – oilaviy tadbirkorlikka aylandi. 
 
Tadbirkor qishning sovuq kunlarida gullarni asrash maqsadida ham tadbirli usullarni yo‘lga qo‘ygan. Issiqxona uchun chuqur qazib, tagiga mahalliy o‘g‘it solingan. Ustidan tuvakdagi gullar terib, ikki qavat polietilen plonka bilan yopilgan. Bu usul bilan gul ko‘chatlari izg‘irinli kunlarda ham nobud bo‘lmay, o‘sishda davom etadi. 
 
“Qalovini topsang, qor ham yonadi”, degan gap bejiz aytilmagan, Ishtoq va mehnat bo‘lsa, hamma narsaning iloji bor. 
 
Shu harakatchanlik bilan Mohira opa limon ko‘chatlarini ham muvaffaqiyatli yetishtirishni yo‘lga qo‘ygan. 
 
– Ko‘chatlarni maxsus gultuvaklarda o‘stiramiz, chunki ba’zi mijozlarimiz yoz faslida ham limon ko‘chatini so‘rashadi, – deydi u barq urib turgan o‘simliklarga qarab. – Qishda limonlarni yopiq joyda saqlash kerak. Buning ham o‘ziga xos qoidalari bor. Unchalik issiqlik ham shart emas. Biz limonlarni qish kunlari asosan ikki qavat plonka ostida saqlaymiz. Tagiga mahalliy o‘g‘it solinadi, ustidan ko‘chatlar teriladi. So‘ng suv sepilsa, go‘ng o‘zidan issiqlik chiqaradi va bu harorat ko‘chatlarimiz uchun yetarli bo‘ladi. 
 
Harakat qilgan odam kam bo‘lmaydi. Mohira opa mo‘’jazgina hovlisida mehnatlari ortidan uy qurgani, mashina olgani haqida ham shukronalik bilan so‘zlaydi. Uning fikricha, birdamlikda olib borilgan ishning qiyinchiligi bo‘lmaydi. 
 
Mohira opa zamon bilan hamnafas bo‘lib, gulchilikka qiziqadiganlarga beminnat maslahat beradi. 2020-yildan boshlab u ijtimoiy tarmoqlar orqali alohida kanal ochib, ko‘chatlarni parvarish qilish va gullarni asrash borasida maslahatlarini berib boradi. 
 
Qahramonimiz xonadonidan qaytar ekanman, bir haqiqatni yanada teranroq anglagandek bo‘ldim: hayot kurashdan qo‘rqmaydigan, mehnatdan tolmaydigan insonlarni siylaydi. Chindan ham ishtiyoq va mehnat bilan olg‘a intilgan insonning yo‘li ham, qadri ham baland bo‘lib boraveradi.