Jizzах vilоyati hоkimligi

Shu nuqtayi nazardan, Jizzax viloyatida amalga oshirilayotgan qo‘ziqorin yetishtirish loyihasi iqtisodiy samaradorlik va oqilona tashkiliy yondashuvning amaliy namunasi sifatida e’tiborga molik. 
 
Janubiy Mirzacho‘l magistral kanali boshqarmasi tasarrufidagi “Paxtakor” avtogaraji hududidagi mavjud binodan unumli foydalangan holda veshenka navli qo‘ziqorin yetishtirish yo‘lga qo‘yildi. Loyiha rivojlantirish jamg‘armasi mablag‘larini ko‘paytirish, budjetdan tashqari daromad manbalarini shakllantirish hamda qo‘shimcha ish o‘rinlari yaratish maqsadida amalga oshirilmoqda. 
 
Dastlabki bosqichda 70 ta maxsus polietilen qoplarga joylashtirilgan tayyor substratlar asosida ishlab chiqarish jarayoni boshlandi. Natijada doimiy ish o‘rni yaratildi va mahalliy aholi bandligi ta’minlandi. E’tiborli jihati shundaki, loyiha katta kapital sarmoya talab etmasdan, mavjud infratuzilma negizida tashkil etildi. 
 
Qo‘ziqorin parvarishi uchun ajratilgan xona agrotexnik talablarga muvofiq jihozlangan. Tabiiy va mo‘’tadil yorug‘lik, 15–25 daraja oralig‘ida barqaror harorat hamda muntazam shamollatish tizimi yuqori hosildorlikni ta’minlamoqda. Mutaxassislar ma’lumotiga ko‘ra, veshenka qo‘ziqorini 10–15 kunda ilk o‘sish bosqichini o‘taydi, 20–30 kun davomida hosil beradi. Bir substratdan bir terimda o‘rtacha 3–4 kilogramm, uch terim davomida esa 9–12 kilogrammgacha mahsulot olish mumkin. 
 
Iqtisodiy jihatdan mazkur yo‘nalish yuqori qo‘shimcha qiymat yaratish imkoniyatiga ega. Qo‘ziqorin bozorda talabgir bo‘lib, parhezbop va sog‘lom oziq-ovqat mahsuloti sifatida e’tirof etilgan. Shu bois, ushbu loyiha nafaqat daromad manbai, balki aholini sifatli oziq-ovqat bilan ta’minlash orqali ijtimoiy barqarorlikka ham hissa qo‘shmoqda. 
 
Eng muhimi, loyiha bo‘sh turgan binolardan samarali foydalanish orqali amalga oshirilmoqda. Bu esa davlat tashkilotlari faoliyatida resurs tejamkor va natijaga yo‘naltirilgan boshqaruv tamoyillari qaror topayotganini ko‘rsatadi. Mazkur tajriba boshqa hududlarda ham qo‘llash mumkin bo‘lgan amaliy model sifatida ahamiyatga ega. 
 
Kelgusida substratlar sonini ko‘paytirish, ishlab chiqarish hajmini bosqichma-bosqich kengaytirish va yangi ish o‘rinlari yaratish rejalashtirilgan. Bu esa loyihaning barqarorligi va uzoq muddatli iqtisodiy samaradorligini ta’minlashga xizmat qiladi. 
 
Xulosa qilib aytganda, kam xarajat talab etadigan, biroq yuqori daromad keltiradigan qo‘ziqorinchilik loyihalari hududiy iqtisodiyotni mustahkamlash, aholi bandligini oshirish va budjetdan tashqari mablag‘lar ulushini kengaytirishda muhim ahamiyat kasb etadi. Bunday tashabbuslarni izchil qo‘llab-quvvatlash iqtisodiy islohotlar samaradorligini yanada oshiradi.