Jizzaxda U-19 qizlar o‘rtasida O‘zbekiston chempionati boshlandi
2026-02-17 08:30:00 / Yangiliklar
Jamoalar 4 ta guruhga ajratilgan bo‘lib, dastlabki bosqich uch kun davom etadi. Guruh o‘yinlari yakunlariga ko‘ra, har bir guruhdan 1–2-o‘rinni egallagan jamoalar chorak final yo‘llanmasini qo‘lga kiritadi. Final bahslari 18 fevral kuni o‘tkazilishi rejalashtirilgan.
Chempionatning ochilish marosimida viloyat voleybol federatsiyasi raisi G‘ayrat Qodirov so‘zga chiqib, yoshlar sportini rivojlantirish va iqtidorli sportchilarni qo‘llab-quvvatlash masalalariga to‘xtaldi. Shuningdek, Milliy olimpiya qo‘mitasining viloyat vakilligi ijrochi direktori Akmal Ahmedov mamlakatimizda ayollar sportiga qaratilayotgan yuksak e’tibor, yaratilayotgan shart-sharoitlar va imkoniyatlar haqida alohida ta’kidlab o‘tdi.
Musobaqa nafaqat g‘olib va sovrindorlarni aniqlash, balki yosh sportchilarning mahorat va tajribasini oshirish, kelgusida milliy terma jamoa safini munosib to‘ldirishga xizmat qiladi.
Tadbir davomida Qoraqalpog‘iston Respublikasi jamoasi murabbiyi Ozod Kazakovning 65 yillik yubileyi munosabati bilan unga alohida ehtirom ko‘rsatilib, samimiy tabriklar izhor etildi.