Zominda muddatli harbiy xizmatchilar uchun imtiyozli tavsiyanoma olish bo‘yicha test sinovlari o‘tkazildi
2026-02-13 09:30:00 / Yangiliklar
Mazkur sinovlar harbiy xizmatni namunaviy ado etayotgan askarlarga respublika oliy ta’lim muassasalariga o‘qishga kirishda qo‘shimcha imkoniyat yaratishga qaratilgan.
Tadbir O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligining Jizzax viloyati bo‘limi mutaxassislari ishtirokida tashkil etildi. Sinovlar avvalida ishtirokchilarga test jarayonini o‘tkazish tartibi va baholash mezonlari bo‘yicha tushuntirishlar berildi.
Belgilangan tartibga muvofiq, xizmatchilar raqamlashtirilgan qurilmalar orqali ro‘yxatdan o‘tkazilib, auditoriyalarga joylashtirildi. 100 ta savoldan iborat test sinovlari jangovar tayyorgarlik, ma’naviy-ma’rifiy bilimlar, matematika, fizika hamda mantiqiy fikrlash yo‘nalishlarini qamrab oldi. Maksimal ball 110 etib belgilanib, sinovni bajarish uchun 3 soat vaqt ajratildi.
Jarayonning ochiq va shaffof o‘tishi ta’minlanib, auditoriyalar videokuzatuv vositalari bilan jihozlandi.
Qayd etilishicha, test natijalariga ko‘ra beriladigan imtiyozli tavsiyanomalar 3 yil muddat davomida amal qiladi. Ushbu tavsiyanomalar harbiy xizmatchilarning oliy ta’lim olish imkoniyatlarini kengaytirish va bilim salohiyatini oshirishga xizmat qiladi.