2025-yilning 9 oyi davomida Innovatsion rivojlanish agentligida jismoniy va yuridik shaxslarning murojaatlarini koʻrib chiqish natijalari toʻgʻrisida ma’lumot

Innovatsion rivojlanish agentligida Oʻzbekiston Respublikasining 2017-yil 11-sentyabrdagi “Jismoniy va yuridik shaxslarning murojaatlari toʻgʻrisida” OʻRQ-445-son Qonuniga muvofiq 2025-yilning 9 oyi davomida jismoniy va yuridik shaxslarning murojaatlari bilan ishlash borasida amaliy ishlar olib borildi.

Agentlikka 2025-yilning 9 oyi davomida jismoniy va yuridik shaxslardan jami 281 ta murojaatlar kelib tushdi. Murojaatlar soni oʻtgan yilga nisbatan 38,0 foizga (179 taga) kamaygan.

Maʼlumot uchun: 2024-yilning ushbu davrida 460 ta murojaat kelib tushgan.

Murojaatlarning 120 tasi Prezident virtual qabulxonasi orqali va 161 tasi toʻgʻridan toʻgʻri yozma, ogʻzaki murojaat shaklida yoki boshqa idora va tashkilotlar orqali kelib tushgan.

Agentlikka kelib tushgan jami 281 ta murojaatning 261 tasi jismoniy shaxslardan, 20 tasi yuridik shaxslardan kelib tushgan boʻlib, shundan 13 tasi yozma, 59 tasi ogʻzaki, 209 tasi elektron murojaatlardir.

Ushbu murojaatlarning 257 tasi (yaʼni 91.5%) agentlik apparatida, 1 tasi (yaʼni 0.3%) hududiy tizim tashkilotlari orqali koʻrib chiqilgan, 23 tasi (8.2 %) taalluqliligi boʻyicha yuborilgan.

Ushbu murojaatlarning 208 tasi (80.6%) qanoatlantirilgan, 40 ta (15.6%) murojaat boʻyicha tushuntirish berilgan, 1 ta (0.4%) murojaat koʻrmasdan qoldirilgan, 3 ta (1.2%) murojaat koʻrib chiqish tugatilgan. 6 ta (2.2%) murojaat ko‘rib chiqilmoqda.

Ushbu murojaatlar hududlar kesimida tahlil etilganda eng koʻp murojaat Toshkent shahridan 102 ta (36.2%) kelib tushgan boʻlsa, Qoraqalpogʻiston Respublikasi va viloyatlardan 179 ta (63.8%) murojaat kelib tushgan.

Ushbu kelib tushgan jami 206 ta murojaatlar:

9 tasi ishlanma, loyiha, ixtiro va boshqalarni amaliyotga tatbiq etish yuzasidan,

17 tasi ishlanma, loyiha, ixtiro moliyaviy qoʻllab-quvvatlash yuzasidan,

17 ta xorijiy ilmiy stajirovkaga oid,

32 ta startap tanlovlariga oid,

38 tasi turli sohalarga oid takliflar,

47 tasi davlat ilmiy dasturlari doirasidagi tanlovlar yuzasidan,

65 tasi doktorantura va ilmiy darajalarga oid,

9 tasi agentlik bilan hamkorlik qilish yuzasidan,

47 tasi boshqa masalalar yuzasidan boʻlgan murojaatlardir.

2022-yil 1-yanvardan boshlab agentlik veb sayti https://innovation.gov.uz/ orqali onlayn konsultatsiya xizmati VERBOX va JIVO/CHAT platformasi ishga tushirilgan boʻlib, oʻtgan davr davomida 1910 ta fuqaroga real vaqt rejimida konsultativ xizmat koʻrsatildi.

Agentlikda Ishonch telefonining samarali faoliyati yoʻlga qoʻyilib, hisobot davrida fuqarolarning 520 dan (2 tasi nazoratga olingan) ortiq qoʻngʻiroqlari huquqiy maʼlumot berish orqali hal etildi va bu boradagi yuboriladigan yozma murojaatlarning kelib tushishining oldi olindi.

Agentlik rahbariyati tomonidan muntazam ravishda shaxsiy qabul va sayyor uchrashuvlar tashkil etilmoqda. Joriy yilda Jizzax va Qashqadaryo viloyatlarida ilm-fan namoyondalari, olimlar, tadqiqotchilar va yoshlar bilan uchrashuvlar oʻtkazildi. Uchrashuvlarda koʻtarilgan masalalarga ijobiy yechim topib berilmoqda.

Shuningdek, Oʻzbekiston Respublikasi Prezidenti Sh.M.Mirziyoyevning tadbirkorlar bilan “Ochiq muloqoti”ni oʻtkazishga tayyorgarlik koʻrish boʻyicha tashkil etilgan Tadbirkorlar murojaatlarini qabul qilish shtabi orqali Innovatsion rivojlanish vazirligiga jismoniy va yuridik shaxslarning jami 8 ta murojaat kelib tushdi. Ushbu murojaatlarning barchasi operativ tarzda koʻrib chiqilib, murojaat etganlar toʻliq qanoatlantirildi.