Said Ahmadning 105 yilligi
2025-06-12 16:40:00 / Yangiliklar
O‘zbekiston Yozuvchilar uyushmasi tomonidan Adiblar xiyobonida O‘zbek adabiyotidagi yorqin yulduzlardan biri, xalqimizning sevimli yozuvchisi Said Ahmad tavalludining 105 yilligiga bag‘ishlangan tantanali tadbir tashkil etildi.
Tadbirda Said Ahmadning o‘zbek adabiyoti rivojiga qo‘shgan ulkan hissasi, uning o‘lmas asarlari va xalqimiz ma’naviyatidagi o‘rni haqida so‘z yuritildi. Adibning ijodiy merosi muhokama qilinib, uning hikmatli so‘zlari va hayot yo‘li yosh avlodga o‘rnak sifatida taqdim etildi.
Tadbirda professor-o‘qituvchilar, talabalar, O‘zbekiston Yozuvchilar uyushmasi raisi Sirojiddin Sayyid, uyushma a’zolari hamda adabiyot va san’at sohasi vakillari ishtirok etdi.
Shuningdek, tadbir doirasida O'zbekiston Yozuvchilar uyushmasi a'zolari bilan birgalikda “Bir haftada–bir kitob” va “Kitobxon yoz – 2025”, adabiyot va sheʼriyat kechasi o‘tkazildi.